Villa hnehtu Wolves an kangsang

Inrinni zan khan Premier League inkhel pakhat a awm a, season duhawm hmang mektu Wolves chuan tla mai thei dinhmuna ding Aston Villa chu 1-0 in an luhchhuah. Nuno Espirito Santo naute hian Champions League rim an nam phak ta!

Villa Park-a inkhelah mikhual Wolves tan midfielder Leander Dendoncker chuan minute 62-naah goal awmchhun a khung a, khualmualah point thum hlu bik tak an hlawh chhuak.

Wolves hian league match 32 an khelh tawhah point 52 hmuin pangana dinhmun an luah. Pahnihna Manchester City hremna kaltlang pui ta se, tuna an awmna angah hian season tawp an hmang a nih chuan UCL an khel phak dawn tihna a ni.

Goal awmchhun khungtu Dendoncker chuan, "Champions League khelh chu player zawng zawng ten kan duhthusam vek a ni. Kan beiseina hi a taka chantir tur erawh chuan hmabak kan la ngah hle.

"League khelh chhunzawm a nih leh hnuah point kua hmuh theih kan hmu kim vek a, match khelh tur kan la neihah hian kan theihna sang ber kan hlan chhunzawm a ngai dawn a ni," tiin a sawi.

Chak lo Villa erawh 19-naah awm mekin point 27 an hmu. A him china awm West Ham nen an point hmuh zat a inang a, Villa hian match khatin an khel hnem thung. Inhamtang turin beisei an la nei thei ang.

Aston Villa manager Dean Smith chuan, "Team ṭha paruk zinga pakhat kan hmachhawn a ni a, a harsa ve deuh a ni. Kan inven ṭhat bakah hun ṭha pawh kan insiam nual, mahse point hmu turin kan vannei 

tawk lo.

"Premier League khelh chhunzawm chungchang hi zawhna kan dawng hnem, ka ngaihdan chuan kan dinhmun hi chu kan kuta awm a ni. Result ṭha kan neih chuan season thara EPL khel turin hun kan la nei," a ti.