New Zealand an chak hmasa

New Zealand chuan India nen ODI match match thum an khelh tura a hmasa berah wicket liin hnehna an chang. February 8, Inrinni hian Eden Park, Auckland-ah match hnihna an khel ang.

Seddon Park-a inkhelah Kiwis ṭhumvawrah an vannei a, vawm hmasak an thlang. India-in batsman an neih ṭhatzia pholangin Shreyas Iyer-a century (103) a siam a, KL Rahul-a'n thi loin run 88 a siam bakah Virat Kohli (51), Mayank Agarwal (32), Kedar Jadhav (26*) leh Prithvi Shaw (20) te an chet chhiat loh avangin over 50-ah run 347/4 an siam.

India hian T20-ah series 5-0 in an la tawh bawk a, ODI-ah Kiwis-in hetiang target hi an la umphak ngai loh avangin Virat Kohli hote hi chak ngei turah a ngaih theih. Amaherawhchu, New Zealand hian nikum World Cup semifinal-ah India hi an hneh a, tun ṭumah pawh Ross Taylor an kawl miau avangin an target sang tak hi an umpha.

Kiwis tan Taylor hian thi loin run 109 a siam a, Henry Nicholls (79) leh Tom Latham (69) puihna nen over 48.1-ah run 348/6 siamin hnehna an chang. India bowler chhuanvawr Jasprit Bumrah-a'n run 53 chauh pe mah se wicket a la lo a, bowler dang Mohammed Shami, Shardul Thakur leh Kedar Jadhav ten wicket la mah se run an pe tam thung.