Club dang chunga leng Zarkawt BCA

Mizoram basketball huangah Zarkawt BCA hming a lian ber. Mizoram Super League 7 champion nomawi chu BCA kutah a lut leh ta, finals game 3-ah Khatla TBL chu 81-73 a hnehin, best of three series chu 2-1 in an la.

Zarkawt BCA hian tun hnaiah a zawnin MSL nomawi vawi li an chawi ta, champion hnem ber an nihna an sawhnghet zel. Season hmasa pahnihah Khatla TBL an champion, a hnuah Mission Veng Vikings tlazep zauhin, a hnu lam erawh BCA rorelna hnuaiah a awm.

R. Dengṭhuama Indoor Stadium, Mualpuiah basketball ngainatu an pungkhawm a, stadium chhunga lut leng lo khawp an kalkhawm. Tualchhung team ṭha pahnih ten inkhel hmuhnawm an chhawp chhuahsak zui a, season thar nghakhlel takin an ṭin.

Inkhel hmuhnawm
A tir aṭangin an inveng tawn, chutih rualin point neih hnem an tum ngam bawk. Quarter hmasa berah hmahruaitu vawi li ngawt an inthlak, a tawpah BCA tan Joseph Allen-a 'Dunk' hmangin an chungnung hret - TBL lamin an 3 points attempt hnuhnung ber an hlah thung.

A rei tual tual a, a hmuhnawm tual tual - kal sang fal thei erawh an awm chuang lo. Chawlhlawk hmaa point nei hnuhnung ber chu Allen bawk a ni, hnai tak aṭangin 2 point a vawm lut zeuh, hun pawimawh laiah a che fuh tlat zel.

Second 20 a la awm zui a, khel ṭha tak Vanlalṭhazuala'n ball kengin shot hnuhnung berah Khatla TBL tana point nei chunga BCA nih rual a tum, mahse point neih a beiseina hi a hmang ṭangkai thei lo, point hniha hniam zawk chungin an chawl.

BCA nge nge
Inkhel boruak a sang a, chungnung zawk an awm hleihtheih loh avangin fans inau tawn thawm pawh a ring hle. Game 2 quarter thumna bikah TBL lamin point sarih chiah an nei, game 3-ah erawh insiamṭhain BCA lehthal nan an hmang thung.

Hun harsaah Lalrina Renthlei a inlar. Tuikhuahtlang tlangval hian a hunah tak basket a rawn nei leh a, point ruka an hniam hmanna chu a rawn tizim a, 3 points nei zauh bawkin an kal fal ta daih - match pawimawh dang ang bawkin a hunah tak a rah.

Quarter hmasa pathuma an chungnun avangin BCA lamin inrintawkna an nei sang a, a tawp berah pawh an chungnung chhunzawm ta tho. TBL lamin holam taka turn over an neih leh, free throw an hlahte kha an chhutkir ang a, an ui leh hnuhnawh khawp ang.

Tualchhung mi
Mizoram Super League-ah hian tualchhung player ni lo, state pawn player bakah India ram pawn aṭang pawhin player chah luh phal a ni. Mahse, ṭum khatah Mizo player ni lo chu pakhat aia tam chhawr theih a ni chuang lo a, an inkhelh chhawk a ngai.

Zarkawt BCA hian Joseph Fredrick Allen an nei a, an chhawr ṭangkai ṭhin. Finals game 3-ah pawh Zonunsanga chuan point 22 a nei a, ani aia nei hnem an awm lo. Lalrina Renthlei (19 points) leh Matthew Remtluanga Sailo (14) te an khel ṭha bawk.

BCA tan player panga in point an nei, tualchhung player ṭha pathum bakah hian point sarih neitu Lalsangkima Ralte leh Lalhnehpuia Chhakchhuak (5) ten an nei bawk a, season tharah an la awmkhawm leh a nih chuan team ṭha berte zinga mi an ni leh ang.

An lawm
Zarkawt BCA coach Lalruatfela chuan, "Player leh coaching staff nen chauha hlawhtlinna hi chan theih a ni lo, a tir aṭanga a tawp thlenga min thlawp tlattu fans chungah kan lawm takzet, anni vanga hetiang dinhmun thleng thei hi kan ni.

"Zarkawt BCA chauh ni loin Mizoram Super League club neitu hrang hrang chungah lawmthu ka sawi bawk. Tualchhung basketball chawi lawr leh tih hmasawn hi tun hma aṭanga kan duhthusam a ni ve ṭhin, tunah a thleng dik mek," tiin Vanglaini a hrilh.

MSL awm hnuah tualchhung basketball-in hma a sawn zel. Lalrina Renthlei chu India team tan a khel phak a; Lalhnehpuia Chhakchhuak leh Dorian Lalsangmawia te chu NBA Academy India-a inzir thei tura thlan zingah an lo tel tawh bawk.