Inter Branch YMA Volleyball Tournament a hnai ta

D3 Amrit Cement 22nd Inter Branch YMA Volleyball Tournament khuhhawnna chu July ni 15, Zirtawpni zan khan CYMA Hall, Tuikhuah-tlangah neih a ni a, Central YMA vice president Lalhmachhuana chuan a Spike Off.

Inelna hi July 19, Thawhlehni aṭangin R. Dengṭhuama Hall, Mualpuiah khelh a ni dawn a, mipa leh hmeichhe inelna niin July 29, Zirtawpniah final khelh a ni ang.

Spike Off chu
Spike Off-naah hian MVA leh Central YMA hruaitute bakah Branch aiawh pathum an kal a, CYMA Hall, Tuikhuahtlang an khat vek. A kawtah pawh mi ṭhahnem tak an awm.

CYMA vice president Lalhmachhuana chuan infiammite chu an thiamna leh theihnate ṭangkai taka hmanga insum theihna nen beidawng loa ke pen zel turin duhsakna a hlan. MVA president leh Main Sponsor Dr Lalmalsawma Nghaka chuan, "Zirna sang zir lo tan pawh kawng engkimah hlawhtlinna a awm thei a, beidawng loa bei ṭang ṭangten hlawhtlinna an chang ṭhin a ni," tiin kal khawmte a fuih.

CYMA finance secretary Roneihthanga chuan fixtures a tlangzarh bawk. Inelnaah hian mipa team 104 leh hmeichhia team 39 an inlan dawn a, an vaiin team 143 an tel dawn. CYMA Volleyball hnuhnung ber hi kum 2018 khan neih a ni a, khami ṭum khan mipa team 57 leh hmeichhe team 19 an tel a, an vaiin team 76 an tel. Tun ṭum inelnaah hian team 67 zetin an tel tam zawk tihna a ni.

Inelna kalhmang
Inelnaah hian branch khat aṭangin team khat zel a tel theih a; Joint YMA, Group YMA, Sub. Hqrs. YMA hminga chhuah theih a ni lo. Chutihrualin Mizoram pawna Group YMA te erawh chu Group YMA hminga tel phalsak an ni.

Team khatah player sawmpahnih (12) bakah Coach, Asst. Coach pahnih, Physio leh Manager an awm thei. Match hi Best of five (5) set, knockout system-a khelh tur a ni ang.

FIVB- 2017 Technical Rules hman tur a ni a, ṭul bik thilah chuan technical committee in a tidanglam thei ang. Player-te chuan an awmna Branch-ah ngei an khel tur a ni a, players chungchangah in chuh buai / inhnial buaina a awm chuan chu player chuan voter ID/ Adhaar card-a a home address-ah an khel tur a ni.

Inelna hi R. Deng-ṭhuama Hall, Mualpuiah khelh a ni dawn a, hall-ah hian court pathum a awm dawn. Chawhma dar 10:00 aṭangin inelna ṭan ṭhin a ni ang.