United-in Eriksen an lalut; Martinez an inrempui

Manchester United chuan Denmark midfielder Christian Eriksen chu free transfer-in an lalut fel ta a, kum thum chhung atan contract an ziahpui.

Eriksen chuan, "Hmachhawp tam tak ka la nei a, hlawhtlinna tam tak ka la chhar thei tih ka hria a, chu ka zinkawng atan chuan United hi a ṭha ber a ni," a ti a, Old Trafford-ah nomawi chawi a tum.

Kartawp kha United fan-te tan chuan lawmna tur a ni - Ajax defender Lisandro Martinez lalut turin Dutch club chu inremna an neihpui bawk a, pound maktaduai 45-in an lalut dawn.

Hei le Eriksen
Euro 2020-ah lung lam fel lohna avangin khelmualah Eriksen a tlu a, hetihlaia Inter Milan midfielder hi a lung hnathawh pui turin a taksaah Implantable Cardioverter Defibrillator (ICD) phum a ngai hial.

Mahse, Serie A lamah ICD vuah tan inkhelh theih a ni lo a, a club khelhna Inter chuan Eriksen-a contract an titawp - January khan Brentford a zawm a, a thiam a la theihnghilh lo.

Brentford tan match 11-ah goal khat khungin assist vawi li a nei a, mahse, Thomas Frank-a enkawl team-ah hian thla ruk atan chauh contract a ziah avangin nipui transfer rualin a zalen.

United thlangtu
Eriksen hi Brentford-in chelh an duh a, a club hlui Tottenham Hotspur hming pawh a ri. Mahse, a tawpah chuan United tana khelh a thlang a, season tharah chuan Red Devils jersey nen kan hmu tawh ang.

Kum 30 mi midfielder chuan, "Manchester United hi club danglam tak an ni a, bul ṭan ka châk tawh hle," a ti a, United chu coach Erik ten Hag vanga zawm a nih thu sawi zuiin, "Ajax-a Erik-a hnathawh ka hmu a, amah leh a staff-ten ni tina hna an thawh dan ka hria.

"Coach ṭha tak a ni tih a chiang a, club tana a hmachhawpte leh a duhdante ka hriatin ka phur lehzual a ni," a ti - phur rei tak maw?

Defender thar Martinez
United-in Martinez lalut turin Ajax an inrempui a, Ajax centre back hian Old Trafford-a medical nei turin Manchester a pan tawh a, he thuziak i chhiar meuh chuan an in lalut fel tawh hial mai thei.

Kum 24 mi defender hian 2019 khan Argentine club Defensa y Justicia aṭangin Ajax a zawm a, Dutch club-a laluttu Ten Hag bawkin Red Devils lamah a hruai leh dawn ta.

Ajax hian Martinez hi chelh an duh viau nia sawi a ni a, mahse, United chief executive Richard Arnold leh football director John Murtough te chuan kar hmasa khan Amsterdam an pan a, inremna an neihpui thei a ni.

Pre-season
Australia-a pre-season tour nei mek United hian an match hmasa berah Liverpool chu 4-0 in an sawp a, Zirtawpni khan 4-1 in Melbourne Victory an hneh bawk. United tan Scott McTominay, Anthony Martial, Marcus Rashford leh Edmond Lupancu (own goal) ten goal khat ṭheuh an khung.

United hian Crystal Palace (July 19) leh Aston Villa (July 23) te chu Australia-ah an la hmachhawn dawn a, Eriksen-a'n a la zawm dawn rih lo.

Mahse, United hian Norway-ah Atletico Madrid (July 30) leh Old Trafford-ah Rayo Vallecano (July 31) an la hmachhawn dawn a, Eriksen a tel tawh ang. Martinez chuan England-a an kir hnuah a zawm ve chauh dawn thung - Red Devils hian August 7 zanah Brighton & Hove Albion nen season thara an league match hmasa ber an khel ang.