Singapore Open champion Sindhu

PV Sindhu hun a thleng ve leh ta, season ṭha takin hmang thei lo mah se nomawi eng emaw ber hi chu a vaw chhuak ve leh mai zel. Indian nula hian nimin khan Wang Zhi Yi hnehin Singapore Open Super 500 trophy a chawi.

Final inkhel a hmuh-nawm, Olympic medal vawi hnih la tawh Sindhu tan Asian Championships gold medallist ni lai hneh mai hi a awlsam bik lo. Mahse, hun pawimawh laia point hmu thei zawk a nih avangin 21-9, 11-21, 21-15 in a chak.

Player pahnih hi tun hmain vawi khat an lo inkhel tawh bawk. Season tir lam khan All England Championships-ah intawngin kum 27 mi Sindhu hi a chak, tun ṭumah hian a vawi hnih nan a hneh nawn leh ta sak a ni.

Season kal laiah Sindhu hian Syed Modi International leh Swiss Open nomawi a lo chawi tawh bawk, tun hi title pathum a lakna a ni. July 28 aṭanga neih tur Commonwealth Games chu inrintawkna sang tak nen a hmachhawn thei ang.