Barca-ah Raphinha a chiang ta

Leiba tam tak neih vanga club talbuai Barcelona-in an ba an rul zo tawh em ni chu aw, tih mai tur a ni - Barcelona hian Leeds United forward Raphinha an lalut fel ta a, a man hi pound maktaduai 55 a ni.

Barcelona chuan an player thar hi an club training ground-ah fan-te hmuh theih turin an tlangzarh tawh a, Nou Camp-a a contract rei zawng hi tarlan ni lo mah se kum nga chhung a cham a rinawm.

Raphinha chuan, "Ka naupan lai aṭang tawha ka mangphan chu a tak ram a chang ta a, ka theihna zawng zawng ka hlan dawn a ni," a ti a, a club ṭan ṭhin êm êm a zawm thei chu a hlim hle.

Leeds United pawhin an player hi thlahin, club tana a hnathawh avangin lawmthu an hrilh a, "Elland Road-a a hun tawp thlengin club tan theihtawp a chhuah a, Brentford Community Stadium-a a goal khung a lawmte kha kan thinlungah a châm reng ang," an ti.

Season hman zawh taka Premier League tawp niah khan Leeds hian 2-1 in Brentford an hneh a, Raphinha hian penalty hmanga goal hmahruai khungin fan-te nen an lawm - an chak avangin Premier League an inhamtang zui a ni.

Kum 2020-a Rennes aṭanga £17mtd-a Leeds pantu Raphinha hi Chelsea, Arsenal leh Tottenham Hotspur pawhin lakluh an duh a, mahse, Barcelona pan a thlang.

Leeds-a a cham chhungin match 67 khelin goal 17 a khung a, assist vawi 12 a nei bawk. Brazilian club Avaí aṭanga a career ṭanin, match a khelhsak hmain kum 2015 khan Portuguese club Vitória Guimarães a zawm a, mahse, a season hmasa berah first team tan match khat chiah khelin, reserve lamah a hun a hmang tam zawk.

Vitória tan hian 2016-17 & 2017-18 ah chuan hmun pawimawh a chang tawh a, match 85-a goal 22 a khungsakin assist 13 a nei a, Sporting Lisbon a zawm zui - match 41-ah goal kua khungin assist vawi nga a nei a, Taca de Portugal leh Taca da Liga-ah a champion pui.

Kum 2019 khan Rennes a pan a, Ligue 1-ah season hnih khelh hnuin Leeds tan Premier League season hnih a khel leh a, tunah chuan Barcelona player a ni ta.