Jesus hi kan mamawh tak a ni - Arteta

Arsenal manager Mikel Arteta chuan an striker thar Gabriel Jesus chu an mamawh tak a nih thu a sawi. Season thar inbuatsaihna inkhelah Jesus hian match hnih aṭangin goal thum a khung tawh.

Nimin zing khan M&T Bank Stadium, Baltimore-ah Gunners hian Everton 2-0 in an hneh. Jesus-a'n goal khat a khung bakah Bukayo Saka-a'n an goal hnihna a khung theih nan a thawhhlawk hle bawk.

Arteta chuan, "A themthiamin a taima hle a, tlarhma lamah kha chuan a che ṭha kual vel vek ni berin ka hria. Kan khingpui tlarhnung tan chuan buaina tham a tling, ani ang hi kan mamawh chu a ni," tiin a sawi.

Premier League season thar inbuatsaih nan Arsenal hian Orlando City leh Chelsea te an la hmachhawn leh dawn.

Arteta-a'n Manchester City lama a lo hriat chian tawh Jesus a hmangthiam dawn niin a lang a, tlarhnung lam thuam chak nan Oleksandr Zinchenko a la leh dawn bawk, club pahnih hi pound makatduai 30-in an inrem tawh.

Ukraine international leh Arsenal lamin contract chungchangah inbiakna an nei chhunzawm a, tunkar chhung chuan inremna an ziak fel hman tura ngaih a ni.