Barcelona striker thar tur Lewandowski

Rei tak an inrim hnuah Barcelona chuan Bayern Munich striker Robert Lewandowski an lalut ngei dawn niin a lang ta a, club pahnih hi a thuphungin an inrem tawh - he thuziak i chhiar meuh chuan an inlalut fel tawh hial ang.

Kum 33 mi striker hian Bundesliga club-ah hian kum khat dang châm turin contract a la nei a, mahse, thla hmasa khan German champion hi chhuah a duh thu a hrilh.

Bayern-in an striker chhuanvawr an chhuahtir loh tur thu sawi reng mah se a tawpah erawh an ṭang zo ta lo a, Poland international hian Barca jersey ha chungin season thar a hmachhawn dawn ta.

Barca chuan, "Medical paltlang leh contract ziah fel chiah a ngai tawh," tiin an sawi a, Bayern president Herbert Hainer chuan, "A tu a te tan pawh thil tihchian vat hi a ṭha a ni," a ti ve bawk.

Hainer chuan sawi zawmin, "Barcelona nen ṭawngkain kan inrem tawh. Robert hi player ṭha tak a ni a, kan hnena a awm laiin nomawi chawi theih ang chu a chawi kim - a chungah kan lawm takzet a ni," a ti a, Lewy a thlah fel der.

Season hman zawh taka match 46 aṭanga goal 50 khungtu Lewy hian kum 2014 khan Borussia Dortmund aṭangin Bayern hi free transfer-in a zawm a, match 374 a khelhsakah goal 344 khungin Bayern tana goal khung hnem lamah Gerd Müller (523 goals) chiah a tluk lo.

Poland international hian Bayern-ah season riat hun a hman chhungin Bundesliga nomawi a chawi vek a, Champions League (1), DFB-Pokal (3), DFL-Supercup (5), UEFA Super Cup (1) leh FIFA Club World Cup (1) ah te champion nomawi a chawipui bawk.

Hetihlai hian chhuak tur anga sawi awm Serge Gnabry chuan Bayern-ah contract thar a ziak a, kum khat chauh cham tura contract nei tawh forward hian kum 2026 thleng Allianz Arena-ah khel turin contract thar hi a ziak a ni.

Kum 27 mi Gnabry hian season hmasa khan inelna hrang hrangah match 45 khelin goal 17 a khung a, assist vawi 10 a nei bawk.