Chelsea-ah Koulibaly a pem ta

Nipui transfer-ah Chelsea thawm a lian zel - Napoli centre back Kalidou Koulibaly chuan Chelsea a zawm ta a, Stamford Bridge-ah hian kum li chhung atan contract a ziak.

Senegalese defender man zat hi tarlan ni lo mah se pound maktaduai 34 bawr niin khawthlang media-te chuan an tarlang a, kum 31 tling tawh defender man atan chuan a tlem lo hle.

Koulibaly chuan, "Chelsea ka zawm thei hi ka hlim takzet - khawvela club lian ber pawl an ni a, Premier League-a inkhelh hi ka mangphan fo ṭhin a ni bawk.

"Kum 2016 khan Chelsea hian min lo dawr tawh a, mahse, kan inremthei lo. Tunah min rawn dawr leh a, Premier League-ah an tana khel turin min duh takzet tih ka hriat avangin ka pawm ta a ni," a ti.

Koulibaly chuan sawi zawmin, "Ka ṭhian ṭha tak tak Edou Mendy leh Jorginho ka bia a, thutlukna siam an tiawlsam lehzual a ni," a ti - Mendy nen hian Senegal tan an khel dun a, Jorginho nen Napoli-ah an khel dun ṭhin bawk.

Todd Boehly leh a thawhpuiten Chelsea an lei hnuah Raheem Sterling chu Manchester City aṭangin £50mtd in an lalut tawh a, Koulibaly an lalut leh ta.

Boehly chuan, "Kalidou Koulibaly hi khawvela defender ṭha ber pawl a ni a, Chelsea-a kan lalut thei hi kan lawm takzet a ni. Hruaitu ṭha tak, midangte tana entawn tlak a ni a, Kalidou tawnhriat leh theihnate hian squad leh club pumpui nasa takin min pui thei ang," a ti.

Chelsea hian nipui transfer-ah defender ṭha pahnih an chân tawh - German defender Antonio Rudiger chuan free transfer-in Real Madrid a zawm a, Andreas Christensen chuan free tansfer thoin Barcelona a pan a, tlarhnung hmun a ruak.

Mahse, London club an che vat a, defender ṭha Koulibaly an lalut thei hi Chelsea fans tan chuan thawk huaina tham tling. London club hian nipui transfer-ah an mit an la len nasa viau nia sawi a ni bawk.

Senegal tana vawi 62 inlan tawh Koulibaly hian French club Metz aṭangin a professional career a ṭan a, Belgian club Genk-ah season hnih a khelh hnuin kum 2014 khan Napoli hi a pan.

Serie A club tan hian inelna hrang hrangah match 317 khelin goal 14 a khungsak a, assist vawi riat a nei tawh bawk. Coppa Italia (1) leh Supercoppa Italiana-ah (1) chiah champion nomawi la chawi mah se Serie A team of the year-ah vawi li ngawt a lang tawh a, 2018-19 season khan Serie A best defender a ni bawk.

Chelsea hian USA-ah pre-season tour an nei mek a, nimin zing khan Timo Werner leh Mason Mount goal khung hmangin Club America chu 2-1 in an hneh a, Reece James chuan an lamah tilutin Mexican club hi goal a khungsak.

Blues hian Charlotte FC (July 21) leh Arsenal (July 23) te chu US-ah tho hian an hmachhawn dawn a, Club America laka hmuh tur la awm lo Sterling leh Koulibaly te chu inlan tawh tura beisei an ni.

US-a hun an hman zawhah Chelsea hian Italy an pan zui dawn a, July 29-ah Serie A club Udinese nen friendly match khelin an pre-season tour an khar ang.

Thomas Tuchel enkawl Blues hian August 6, zan dar 6:00-ah season thar atana an league match hmasa ber an khel dawn a, khualmualah Everton an lenchilh dawn a ni.