Sialkhawpui hraichawi lengte Lammualah an lam siau e
LBS Suzuki All Mizoram Inter Village Football 2022-ah Sialhawkin Ramhlun North hnehin final an lut.
Inrinnia semifinal inkhel hmasa zawkah hian hun pangngaiah 2-2 in an inhnehtawk a, penalty shootout-ah R. Laldanmawia'n chakna goal khungin Sialhawk 4-2 in an chak.
Kum 2011 chhiarpuia chhungkua 430 lek awmna khua Sialhawkin Mizo mipui rilru an hneh a, neutral supporter zawng zawngin Sialhawk lam an awn. Lammualah pawh 'Unji Lasi' tih chu ṭawngkam lar a ni a, 'Sialhawk an pui keih keih' tih thawm hriat tur a awm deuh reng a, Sialhawk thli a tleh a ni ber.
A hmuhnawm
Sialhawk leh Ramhlun North ten football class sang ber an khel lo a, football hmuhnawm erawh an khel chhuak thung.
Club football inkhel anga ball inpe kual mam dak ṭha tak a awm lo a; team pahnihin ball an vawrh nasa a, a khat tawkin goal chance hmun tur a awm deuh reng a, football hmuhnawm a tling.
Minute 10-na lekah Hyderabad FC reserve team-a khel mek Crespo Vanlalhriatpuia freekick chu Sialhawk captain Danmawia'n tauh pial zauhin goal ban fuhin a lut.
Sialhawk an khel ṭha zui a, minute sarih hnuah Danmawia ball pek duhthusam chu Rotluangliana'n goal ruaka a thun hmain a kut a tihper!
Counter attack hmanga khel ṭhin Ramhlun North chu team ṭha zawk dinhmuna an din chiahah an talbuai a, game mumal khelh an harsat.
Sialhawkin an nawr chhunzawm a, minute 32-naah erawh Ramhlun North-in ṭha zetin an chhu lêt. PC Lalhruaisanga'n halfway line aṭangin ball ṭha a pe lut a, striker chak ṭha K. Lalrosanga'n amah vengtu tlan pelin mawi zetin a pet goal.
Second half-ah pawh Hruaisanga leh Rosanga-te bawk an hlauhawm. Hruaisanga'n ṭha taka la chhuakin a ball pek luh fing zet chu Hruaisanga'n a um lut a, Sialhawk defender Lalmuankima'n a titlu. Mipuiin 'red card' tihin an au rual a, referee-in 'yellow card' a pe thung.
Minute 69-naah Ramhlun North midfielder hmuhnawm Lalpekhlua Jongte-in mawi taka a virpui hnuah ball ṭha a pe lut a, hemi per hi amah vekin goal-ah petin Sialhawk defender-in dang perin goal-ah a lut.
Si an phur hnuah Sialhawk an beidawng duh lo a, a tawpah goal hlu tak an sual chhuak. Ramhlun North keeper ṭha Lalṭanpuia a chefuh tawk lo a, a ball hnek per ṭhat tawk loh chu Rotluangliana'n a bin let a, Lalmuankima'n minute 87-naah goalline aṭangin a tauh goal - Lammualah thawm a ring hle.
A hmuhnawm zel
Extra time khelh a ni a, goal a luh belh tawh lo. Thil thleng langsar erawh a awm. Minute 105-naah Danmawia volley chuan Ramhlun North defender Benjamin J. Lalrinliana kut a per niin a lang a, Sialhawkin penalty beisei mah se pek an ni lo.
Penalty hmangin chak zawk zawn a ṭul a, Ramhlun North-in an pet hmasa. Lalhruaisanga'n pet goal nghalin Sialhawk wing back chak ṭha Lalfamkima'n a rawn pet goal ve bawk. Substitute C. Vanlalnghaka'n pet goal lehin mahni fan-te hmaa pet Ramhlun North dinhmun a ṭha zel.
Sialhawk tan Malsawmzuala'n a rawn pet goal leh a, 2-2 a ni. Boruak a sang zel, C. Lalmuanpuia ball pet chu Sialhawk keeper TC Ramnundanga'n a dansak. Sialhawk tan Lalramhluna'n a khung laiin Ramhlun North midfielder Lalpekhlua'n goal ban a pet per.
Danmawia a rawn pen chhuak a, goalkeeper Lalṭanpuia bumin final thlenna goal a khung.
An pui keih keih
Sialhawk thli a tleh fuh a, khelmual chhung chauh ni loin khelmual pawnah pawh an boruak a lian. An khawih apiang rangkachakah a chang ta emaw tih mai tur a ni a, an chesual thei lo - vanneihna an lamah a ṭang tih theih a ni.
An thlenna Bethlehem Veng-in Sialhawk hi an ṭawiawm ṭha a, YouTube lama hriat lar Zopa Hnathawh hmangin thawm an nei ring. Sialhawk hla Chhartea phuah 'Sialhawk tan Unji Lasi' tih hi hi inlungrualna an neihna kawngah a pawimawh a, final-ah pawh an thawm a ring ang.
Semifinal
Sialhawk VC 2 - 2 Ramhlun North LC
Penalty Shootout-ah Sialhawk 4-2 in an chak
SIA : R. Laldanmawia 10'; Lalmuankima 87'
RAN : K. Lalrosanga 32'; Lalpekhlua Jongte 69'
Lengpui VC 1 - 2 Champhai Kanan VC
LEN : Jacob Lalrinnunga 67'
CHA : Laltlanzova 53'; C. Lalchhawnkima 87'
Final - July 19, Thawhlehni
Sialhawk VC 3:00 PM Champhai Kanan VC