Champhai Kananin ram nuam an pan zel
Champhai Kananin Aizawl khaw pawn aṭanga Lammuala nomawi chawi tawh Lengpui chu semifinal-ah 2-1 in an hneh a, champion thar an awm dawn.
Champhai Kanan leh Sialhawk ten July 19, Thawhlehni tlai dar 3:00 hian Lammualah nomawi an inchuh ang.
Inrinni tlai Lammual inkhel hmuhnawm takah Champhai Kananin Laltlanzova hmangin goal hmahruai an khung a, Lengpuiin Jacob Lalrinnunga hmangin si phurh an sut. Minute 87-naah Champhai Kanan captain C. Lalchhawnkima'n chakna goal a khung.
A goal lo
Semifinal hmasa zawk boruak a sang a, entu an ṭhahhnem. Penalty pet a ngaih bakah ruah a sur avangin semifinal pahnihna pawh inkhelh sawn hnun a ngai hial. Inkhelh hun hi sawn hnung hret lo se chuan ṭhutna nei lo an awm ṭeuh ang.
Inkhel hnuhnung zawk game kalhmang a 'class' hret a, an ball inpe kual vel a nalh - player skill a sang a, a hmuhnawm zawk leh zawk loh erawh a thlirtu mit lam a ni ang!
Champhai an chungnung hret a, midfielder Lalramsanga chu game siamtu niin tlarhnungah captain Chhawnkima a khawng ṭha hle. Chutihrualin Lengpui lamin Lalremsanga hmangin chance ṭha an nei a, Aizawl FC striker hian a hlah.
A goal ta
First half-ah goal hmuh tur a awm lo a, second half-ah a goal ta.
Champhai Kananin ṭum danga an tih ṭhin dan angin goalkeeper leh defender inkar hmun awl an hmang ṭha a, Chhawnkima ball vawrh luh chu ZoZoa'n a tauh lut. Goal hmahruai khungtu hi kumin Khelo India final-a Mizoram tana hattrick siamtu kha a ni.
Lengpuiin an nawr let a, minute 67-naa Lalmuanzuala freekick pet chu substitute Jacob-a'n hnai tak aṭangin a tauh goal. Lengpui an phur a, Champhai an la zuai bik lo.
Hun tawpah erawh Champhai Kanan an vannei ta zawk a, hla tak aṭanga an freekick pet chu Chhawnkima'n a tauh goal.
Champhai captain-in goal a khung hian minute 87-na a ni tawh a, Lengpui an tho chhuak thei ta lo.
Defender chhuanvawr Chhawn-kima hian vawi duai lo goal tur a dang a, goal tur a siamsak a, a tauh goal bawk!
Eng nge an sawi?
Champhai coach H. Lianthanga (Mapuia) chuan, "Player-te an ṭang rual a, team boruak a ṭha. Tun dinhmun kan thlen theih chhan hi Pathian kan auh tam na rah kan seng a ni ber a, inchhuanna tur an nei lo," tiin Vanglaini a hrilh - penalty shootout-a vawi thum chak chho an ni!
Lengpui coach Rohmingthanga chuan, "A vanduai zawkah kan ṭang a, kan khingpui Champhai Kanan an ṭha ve bawk. Team ṭha tak kan hneh lo a, champion turin duhsakna ka hlan e," tiin a sawi.