Leeds tan Premier League a hnai

English club ropui zinga mi Leeds United chuan Inrinni zan khan Fulham 3-0 in an hneh a, an elpui West Bromwich Albion-in Brentford 1-0 a an hneh loh avangin Championship-ah Marcelo Bielsa hote hmahruaitu an ni leh ta. Leeds hian match 39 aṭangin point 74 an hmu a, anmahni hnaih bertu West Brom aiin point thumin an hmu sang zawk.

Elland Road-ah Leeds United-in bul an ṭan ṭha a, minute 10-na lekah Helder Costa pass chu Patrick Bamford-a'n goal-ah a chantir. Kum 26 mi English striker Bamford hian tun season-ah goal 14 a khungna a ni a, club top scorer a ni. Fulham-in Championship-a top scorer Aleksandar Mitrovic (goal 23) an kawl a, Leeds tlarhnung tan buaina tham a tling.

Amaherawhchu second half-ah Leeds tan Ezgjan Alioski (56') leh Jack Harrison (71') ten an khung belh a, palinaa awm mek Fulham-in goal an khung lo a, 3-0 in inkhel a tawp. Inkhel dangah pahnihna West Brom leh pathumna Brentford te an inkhel a, match pawimawhah minute 16-naa Ollie Wilkins goal hmangin Brentford an chak.

Championship-ah match 46 khelh tur a awm a, match sarih khelh tur a la awm avangin engmah a la chiang lo. Leeds United hi pathumnaa awm Brentford aiin point riatin an sang a, season thara Premier League khel chiang turin point 14 an la mamawh a, chetsual theih chu ni bawk mah se Bielsa hoten Premier League an khelh ngei a rinawm ta hle.