Bayern-in Bundesliga nomawi an chawi ta

Bayern Munich-in Inrinni khan Wolsburg 4-0 in an sawp a, Volkswagen Arena-ah Bundesliga nomawi an chawi. Bavarian thupui chu 'mia san mia' a ni a, 'kan lan ang hi kan nihna a ni' tihna a ni a, an nihna chu Germany football team ropui ber a ni.

Bavarians hian November thla khan manager Niko Kovac an ban a, Hans-Dieter Flick kaihhruaina hnuaiah December aṭangin hneh loh an tawng tawh lo. Season tawp lam match 13-ah hnehna an chang vek a, Gerd Müller-te vanglaia Bayern Munich hnua Bundesliga season khata goal 100 khung thei pahnihna an ni - league nomawi a zawna vawi riat an chawina a ni bawk. 

Season kharna inkhelah hian Bayern Munich-in Wolves lakah harsatna an tawk lo a, minute 4-na lekah Kingsley Coman-a'n goal a khung a, first half-ah Mickael Cuisance-a'n a khung belh. Minute 71-naah Wolfsburg midfielder Josuha Guilavogui hnawhchhuah a ni a, penalty chawi bawkin Lewandowski-a'n goal-ah a chantir. Goal lina hi Bayern ti Bayern-tu an tih ṭhin Thomas Muller-a'n a khung a, tun season-a Bavarians-in league-a goal 100 an khungna chiah a ni bawk.

Inkhelh zawhah Bayern-in thuchhuah an nei nghal a, an fan-te chungah lawmthu an sawi. An stadium ropui tak Allianz Arena chu a senin an ti êng a, a varin 'Danke' (Kan lawm e) tih a inziak. Volkswagen Arena lamah Bayern-in nomawi an chawi a, hetia a zawna vawi riat an champion takah chuan 'mia san meister' tia inchhal thei an ni ta, chumi awmzia chu 'a thiam ber chu kan ni' tihna a ni.