Mission Veng Vikings an champion

Mizoram Super League Season 3-ah Mission Veng Vikings an champion.

Veng mipui ṭawiawmna nei ṭha ber Mission Veng Vikings hian vawi khat final luhnaah a zawna vawi thum nomawi chawi tum Khatla TBL an hneh.

Vikings innghahna Ronald March chu most valuable player atan thlan a ni a, team captain Moses Zoremmawia chu best defensive player atan thlan a ni.

Champion team hian Rs 1,30,000 an dawng a, mimal lawmman dawngtute hnehah hian Panasonic LED TV pek an ni.

Dan rual loh March
Mission Vengin Ronald March an chah thlen hmain kai thar Chanmari Hollow an hneh lo a, American player-in Aizawl a thlen zanah Zarkawt BCA an hneh lo leh bawk.

March hian match riat a khelh aṭangin point 264 a score a, match tina point 33 nei ang zel a ni. Final Game 3 khelh hma hian Khatla TBL coach leh player nikawp H. Laldinsanga chuan, "March dan theih dan kan zawng a, tum neiin kan khel dawn," tiin Vanglaini a hrilh.

TBL hian theih­tawp chhuah mah se March dan dan an hmu chhuak thei lo a, Khatla club hian an ṭhenawm Mission Veng kutah Mizoram basketball roreltu an nihna chu an pe lo thei ta lo.

Zarkawt BCA coach hlui Lian­sangpuia chuan, "March chu dan ngaihna a awm lo. A zuanin amah vengtute lu zawnah a mawng a awm a, boruakah a awm rei theih avangin a thil tum a thlak thei a, mawi lo leh na taka foul chuan hremna a awm zel si avangin ven a harsa a ni," a ti.

Hmuhnawm
Vikings innghahna March-a'n first quarter-ah vawi hnih chiang zetin a dunk nghal a, ṭum hnihna tura Lalrina Renthlei pek American player-in a dunk nghal chuan entu mit a ti tlai hle.

Mission Veng tan Michael F. Lalawmpuia (14 pts), Lalrina Rentlei (13), Moses Zorema (10) leh Lalruatkima Sailo ten American player an thlawp ṭha a, mimal taka fak tlak ṭheuh an ni.

Best defensive player-a thlan Moses-a'n a thawhrimna hmangin cap­tain a nihna a pholang a, Tui­khuahtlang tlangval Lalrina'n a talent neih ṭha zia lantirin Michael F-a'n league-a hmahruaitu Zarkawt BCA aṭanga Vikings a pan chu duh thlang sual angin league round-ah lang mah se nomawi a chawi phahna a ni.

Khatla TBL-in chak tum­in theihtawp an chhuah a, amah­erawhchu American player Chris Solomon leh semifinal aṭanga an lak thar Akash Deep Hazra ten March an elphak miau loh avangin tih theih an nei lo.

Vawi 90
Vikings hian MSL nomawi chawi tur hian vawi 90 zet an practice a, kumin January 7 aṭangin MSL training ṭanin nomawi an chawi thlengin tha an thlah lo.

Season a tawp meuh chuan Vikings hi team satliah ni tawh loin chhungkua ang maiin an inpawh tlang tawh a ni.

An practice zat aṭangin an thawk­rim tih a chiang. Coach Reuben Lalchhandama remhriatna leh manager H. Lalhruaitluanga thawhrimna te, club hotute aṭanga thlawpna an hmuh ṭhatnate chu an champion-na chhan a ni.

Ṭantu an hlu
MSL-in ngaihven a hlawh tawh avangin R. Dengṭhuama Stadium khat tlat mipui an pungkhawm a, final entu hi mi 3,000 chu an tling ngei tura ngaih a ni.

Final entu pungkhawm zinga mipui tam zawk hi Mission Veng ṭantu an ni a, an ṭhutna tur hmuna an len loh avangin Khatla TBL ṭhutna lam thlengin an ṭhu a, thawm an nei ṭha em em bawk.

Mission Veng hi champion tura beiseiawm zawk an ṭan vanga tam an ni lo a, season liam taa semifinal-a an tlak ṭum pawhin an ṭhahnem tawh. Kuminah pawh entu neih tlem lai an nei lo a, finals game 1-ah 52 - 66 zeta an chak lo chung pawhin an beidawng lo.

Court chhunga team ṭha zawk hi court pawnah pawh ṭantu nei ṭha zawk an ni a, vawi thum champion tum aiin la champion ngai lo hian nomawi an duh zawk a, an sual na zawk a, a tawpah an hlawh chhuak.

Mission Vengin champion zan hian Sikulpuikawnah lawmna hmasa an buatsaih nghal a, an thawhrim avangin chenna ngai loh ram thlen hi an phu a ni.