Nomawi nen Lahm leh Alonso an chawl ta

Bayern Munich captain Philipp Lahm chuan a club hmangaih Bayern Munich tan a match hnuhnung ber a khel ta. Inrinni zan khan Bayern hian tun season-a an league match hnuhnung ber atan Freiburg 4-1 in an sawp a, a zawna a vawi nga nan Bundesliga title an la.

German champion tan hian midfielder Xabi Alonso leh keeper Tom Starke te pawhin club tana an match hnuhnung ber an khel a, Allianz Arena-a mipui 75,000 pungkhawm hmaah inkhel ṭan hmain season tawp ruala chawl tur player pathumte hi inkhel ṭan hmain thlahna thilpek hlan an ni.

Carlo Ancelotti naute hian thla hmasa khan Wolfsburg 6-0 a hnehin league champion an ni chiang tawh a, midang tan umphak theih an nih tawh loh hnuah pawh an inthlahdah chuang lo.

Freiburg lakah hian Arjen Robben, Arturo Vidal, Franck Ribery leh Joshua Kimmich ten goal khungin tun season-ah league match vawi 25 an chak tling chiah a, point 82 hmuin pahnihna RB Leipzig aiin point 15 in an sang fal zawk.

Bayern Munich coach An­celotti chuan, "Lahm leh Alonso ten player an nih laia an career an hmang zo ta, hna ropui tak an thawhte avangin an chungah ka lawm hle. Tunah chuan an hmun ruak luahkhat tur zawn hmuh hi hna pawimawh hmasa a ni," tiin a sawi.

Mihrang a liam

Bayern Munich chairman Karl-Heinz Rummenigge chuan, "Pasalṭha tia koh hi a phu, khelmual chhhungah leh pawnah pawh kan captain a ni a, he club tana mipawimawh leh hlu bik a ni," tiin Lahm thlahna thu a sawi.

Lahm hian kum 11 mi chauh a nih laiin Bayern a zawm a, loan hmangin Stuttgart tan a khel zuai tih bak chu a nghetin club dang a zawm lo. Bayern tan hian kum 2002 khan a match hmasa ber a khel a, a chawlh ni thleng hian inelna hrang hrangah match 517 a khelh sak.

Defender ni mah se midfiel­der atan pawha hman theih Lahm hian Bavarian club tan Bundesliga title pariat chawi hmanin Bayern legend - Oliver Kahn, Bastian Schweinsteiger leh Mehmet Scholl te nen league-a an champion zat a inang.

Kum 33-a upa Lahm chuan, "Khelmual chhunga hun hman hi ka nun a ni tawh a, vawiin zet chu rilru a khingbai duh zawk hial mai! Ka ṭhiante nen kan inkhelh ho hnuhnung ber ka thleng ta der mai a, mitin maiin duhsakna min hlan zawng zawngte kha a hlu ka tiin ka lawm takzet. He club ṭantute leh hmangaihtu zawng zawngte an kal leh zelna turah duhsakna ka hlan," tiin a sawi.

Bayern chuan an captain thlah­na thu hetiangin an sawi ve bawk, "Kan duhthusam min tihhlawhtlin sakin hlimna chhiar­sen loh min tawntir. Kan lawm e captain, damtakin..." an ti.

Mangṭha Alonso

Liverpool leh Real Madrid midfielder hlui Alonso-a'n season tawpa a contract a hman zawh hunah inkhelh a chawlhsan tur thu a sawi lawk tawh, German champion tan a hun tawp a thleng ta a, khelmualah a inkhel lai kan hmu zui tawh dawn lo.

Kum 35-a upa Alonso hian Champions League nomawi vawi hnih a chawi a, league title pali a lak zinga pathum chu Bundesliga a ni. An ram Spain chu 2010 World Cup bakah 2008 leh 2012 Euro­pean Championship-ah te hlawh­tlinna a chanpui a, ani aia career duhawm nei an tam lo ang.

Bayern chairman Rum­menigge chuan, "Alonso hi tun hnaia player kan lakluh fuh ber pakhat a ni. A fingin a remhre hle a, ka player hriat tawh zinga ṭha leh hlu berte zinga mi a ni," tiin Alonso a dahsang hle.

March thla a inkhelh a chawlh­san tur sawitu Alonso hian, "England, Spain leh Germany-a team ṭha ber tan ka khel thei a, player leh coach ropui tak takte nen kan thawhho bawk avangin career duhawm tak a ni," tiin a lo sawi tawh. A seilenna Real Sociedad aṭanga bul a ṭan thei chu vannei a intih thu a sawi bawk.