Clay-ah Nadal a chak lo

Rafael Nadal chu tun season-a a vawi khat nan clay court-ah a chak lo ve ta. Zirtawpni zan khan Nadal hi Dominic Thiem hneh loin Italian Open quarterfinal aṭangin a tla.

World number 4 Nadal hian clay-ah match 17 chhung zet a zawnin hnehna a chang tawh a, Barcelona Open leh Madrid Open final-ah te Thiem hneh chung hian nomawi a chawi - tun ṭumah erawh Austria tlangval vanneih ni a inher chhuak a, darkar khat leh minute 51 chhungin world number 7 hi 6-4, 6-3 in a chak.

Kum 30-a upa Nadal hian tun season tir lamah beisei phak lo mah se clay court-ah erawh player hlauhawm berte zinga mi a la ni reng tih a chiang, Monte Carlo, Barcelona leh Madrid-ah te hlawhtlinna a chang a, vawi sarih a champion tawhna Rome-ah hlawhtling lo mah se May 28 aṭanga main draw khelh ṭan tur French Open-ah a vawi 10 nan nomawi chawi a tum leh ang.

Quarterfinal inkhel dangah world number 2 Novak Djokovic chuan Juan Martin del Potro 6-1, 6-4 in a hneh. Djokovic leh Thiem te hi Inrinni zan khan semifinal-ah an intawng zui a, Serbian tlangval hian minute 59 chhung lekin 6-1, 6-0 in hnehna a chang.

Semifinal lehlamah Alexander Zverev chuan inkhel inhnehtawk takah John Isner 6-4, 6-7 (5-7), 6-1 in a hneh ve bawk. Nizan khan kum 20-a upa Zverev leh Djokovic ten final an khel a, he thu buatsaih lai hian result kan hre hman lo a ni.