India U17-in Italy U17 (?) an hneh Lawmna tur nge mualphona?

FIFA World Cup Under 17 khel tura inpuahchah mek India Under 17 chuan Zirtawpni zan khan 2-0 in Italy Under 17 an hneh a, Abhijit Sarkar (31') leh Rahul Praveen (80') ten goal khat ve ve khungin Italian rawlthar rual ten a chhanletna tur an nei thei lo.

Europe-a team ṭha pawl Italy an hneh avangin Indian rawlthar rual ten fak an hlawh a, phai media lamin an ziak kur nasa hle. Mahse, World Cup 2017 khel tura inbuatsaih mek India U17 chet ṭhatna faka hlim authawm pawh a reh fel hmain chanchin hriat nuam lo hriat tur a awm nghal a, chu chu India U17-in an hneh team hi Italy U17 'tak tak' an ni lo tih hi a ni!

India U17 chu

October 6 aṭangin India-ah FIFA Under 17 World Cup khelh a ni dawn a, a thlengtu nih vangin India pawhin U17 World Cup hi an khel dawn. FIFA ranking-a 100-na ni mek India tan age level mah ni se World Cup meuh an khel tur hi a ropui a, All India Football Federation (AIFF) chuan hun rei tak chhung aṭang tawhin India U17 hi khawvel hmun hrang hrangah practice match khel turin a zin kual tir ṭhin.

Tun dinhmunah pawh AIFF-in Portuguese coach Luis Norton Matos enkawlna hnuaia awm mek India U17 hi Europe-ah inelna hrang hrang hmachhawn turin a tir a, Italy U17 an hmachhawn hma hian match sarih an khelhah Benfica U17 leh Saint Leu U17 an inhnehtawkpui tih loh chu an tlawm fai vek.

Engtin zel?

India U17-in Italy U17 meuh an hneh nia a lan avangin India rama football ngainatute an hlim a, lawmpuina au chhuah­puitu hming langsar zingah Bollywood actor lar Abhishek Bachchan, sports minister Vijay Goel, cricketer lar Virender Sehwag, Mohammad Kaif, India captain Sunil Chhetri leh Mizo tlangval Jeje Lalpekhlua te an tel a, Indian football ngainatute an hlim.

Mahse, Asian Football Con­fe­deration meuhin India U17 lawmpuina thu twitter lama an ziah laiin Italian Football Federation (FIGC) website-ah an U17 inkhelh thu hmuh tur a awm lo a, India nena inkhel chungchang engmah ziah emaw tarlan a awm hran lo - rinhlelhna a piang ṭan.

Tute nge?

India U17-in an hneh team hi Italy U17 an nih loh chuan tu te nge India-in an hneh hi? tih chu zawhna awm nghal a ni a, a chhanna chu Italy Lega Pro U-17 aiawhte an ni, tih hi a ni. Lega Pro 1 leh 2 hi Italy football-a third division leh fourth division-te an ni a, chumi awmzia chu India U17-in an hneh tak team te hi Italian third division leh fourth division-a naupang ṭha thlankhawm an ni tihna a ni.

Lega Pro club langsar Parma leh Albinoleffe te chuan India U17 nena inkhelh chungchang hi an website lamah an pholang a, Lega Pro official website chuan an tarlang ve bawk. India-in an hneh tak team hi Italy U17 dik tak an ni lo tih tichiangtu pakhat chu Italy U17 team hi Palermo leh Cesena te pawh lo enkawl tawhtu Daniele Arrigoni kaihhruai an ni a, Italy U17 team diktak erawh Fiorentina defender hlui Emiliano Bigica enkawl an ni thung.

Azzurri lamah engtin?

Italy U17 hi UEFA European Under-17 Championship khel zo hlim an ni. An match hnu­hnung ber chu May 9 khan khelin Turkey an hneh lo a, group stage aṭangin an tla. Italian football journalist langsar Emanuele Giulianelli chuan, "Italian media lamah he match chungchang hi engmah tarlan a ni lo," a ti a, Azzurri U17 tak tak inkhel se chu media lamah tarlan a nih tur thu a sawi.

Emanuele Giulianelli chuan, "India U17-in an hneh team hi Italy U17 an ni lo a, Lega Pro aiawhte an ni," tiin a sawi a, Italian third division club Albinoleffe chuan May 23 zanah India U17 leh Lega Pro U17 team te hi an inhmachhawn leh tur thu club website-ah an tarlang.

AIFF insawifiahna

India U17 hneh hi Lega Pro lam aiawhte pawh nise India ram football dinhmun ngaihtuahin result ṭha tak a ni a, mahse AIFF-in Italy U17 anga a sawi kher hi football ngainatuten an hrethiam lo - AIFF an insawifiah nghal. Indian FA lama an hotu pakhat, a hming tarlan loh chuan, "Kan friendly match khelh tur atana indawrna kan neihpui chu Italian football federation char char an ni a, Zirtawpni tlaia kan inkhelhpui team pawh hi anmahni tirh thlap niin Italy national team jersey ngei ha chungin min hmachhawn a ni," a ti.

AIFF hotu chuan sawi chhunzawmin, "Engkim dan ang thlapin kan ti a, Italian FA lamin an first team khelhtir loh an thlang a nih chuan engvangin nge keini dem kan nih daih ang? Kan team tum kha Italy aiawh ngei an ni tihah hian buaina tur a awm lo, " a ti a, dawt hmanga AIFF-in thil ti anga an sawi chu a pawm lo.

AIFF ṭanpuitu

Indian FA an insawifiah a, an insawifiahna hi hnawl ngawt theih a ni lo. International match chungchanga FIFA dan leh hrai ziahna article 4 para 4-ah chuan Tier 2 international match (senior team match ni lo zawng) khelh a nih dawn reng rengin an ram FA chuan an awmna khawmualpui hotute hnen aṭangin phalna an la thlap tur a ni, tih a ni.

Italy FA-in UEFA aṭanga phalna an neih chu AIFF hnenah fax hmangin an thawn thlap a, India pawh Asia Football Confederation hnen aṭanga phalna la ve turin an ngen. Indian FA-in dan ang thlapin AFC hnen aṭang hian phalna an la bawk - tuna a lan dan chuan AIFF hi dem tur an niin a lang lo.