UCL khel tur Gladbach

Bundesliga season a tawp takah chuan Champions League leh Europa League khel tur bakah relegate tur thlengin a chiang nghal. Bayern Munich an champion a, pahnihnaah Borussia Dortmund an awm.

Match tawp ber hmaa pahnihna ni chiang tawh Dortmund hi Hoffenheim lakah 4-0 in an mualpho a, Andrej Kramaric-a'n goal li ngawt a khung. RB Leipzig pawhin pathumna ni turin Augsburg 2-1 in an hneh a, Chelsea zawm tur Timo Werner-a'n goal hnih a khung.

UCL hmunruak zinga tawpna ber hnawhkhattu tur hi match tawp ber khelh hmain a la chiang lo. Borussia Monchengladbach leh Bayer Leverkusen ten beiseina an nei ve ve a, amaherawhchu Borussia Monchengladbach-in Hertha BSC 2-1 a an hneh tak avangin Mainz 05 hnehtu Bayer Leverkusen UCL khelh beiseina a tawp.

Bayern, Dortmund, Leipzig leh Gladbach ten Champions League an khel ang a, Europa League-ah Bayer Leverkusen, Hoffenheim leh Wolsburg te an inlan ang. Wolves hi pasarihna an nih avangin second qualifying round aṭangin an khel ṭan ang.

Bundesliga-ah table hnuai lam pahnih an relegate nghal a, Fortuna Dusseldorf leh Paderborn te an relegate. Dusseldorf hian chak se playoff khel thei tur an ni a, amaherawhchu Union Berlin lakah 3-0 in an tlawm. Werder Bremen-in an hun ṭha neih an bawhpelh lo a, 6-1 zetin FC Cologne an sawp. Bremen hian playoff-ah Bundesliga 2-a pathumna nen Bundesliga khelh inchuhin home leh away hmangin playoff an 

khel ang.