India-in England lakah series la leh ta

Twenty20 international-a England laka series an lak hnuah India-in zahngaihna lantir an duh lo a, ODI series match thum an khelhah 2-1 in England lakah series an la leh ta.

Match hmasa pahnihah India leh England hi vawi khat ve ve an chak a, Pathianni khan match thumna an khel - chak zawk tan series lak tur a nih avangin 'final' tia chhal ngam a ni.

Men in Blue hian wicket ngain hnehna an chang a, 2-1 in series an la fel - India hian July 22 aṭangin Trinidad and Tobago-ah West Indies nen ODI series an khel zui leh ang.

Bul ṭantu Siraj
Emirates Old Trafford, Manchester-ah inkhelh hmain ṭhumvawr a ni a, vannei zawk India captain Rohit Sharma-a'n vawm hmasak a thlang a, mualneitu England-in ball an hmachhawn hmasa zawk.

England tan Jason Roy chuan run 41 rawn siam mah se a tir lama a dinpui Jonny Bairstow leh Joe Root ten Indian bowler Mohammed Siraj an ngam lo a, an talbuai.

Siraj chuan English batsman pahnih hi run an siam hmain a vawm out a, kum 28 mi bowler hian wicket dang la zui lo mah se a tir lama Bairstow leh Joe Root te a vawm out hi India tan chakna hnar a ni.

All out!
Tun ṭum series-a England inhmeh tak pakhat chu "all out" tih a ni - mualneitu team tan hian Jos Buttler (60 runs) chuan beiseina rawn siam ve leh mah se England-in eng ruai an ang zui lo.

India tan Hardik Pandya a rawn inlar a, over sarihah run 24 chiah a pe a, wicket li a la - Pandya pui turin Yuzvendra Chahal a inlar ve bawk a, kum 31 mi bowler hian wicket thum a la.

England-in over 45.5 bak an tlin lo a, run 259 chiah hmuin an out vek - India tan target huphurhawm a ni lo a, mahse, series match hnihnaah Men in Blue hian England target siam run 247 an phak lo a, fans an hlauthawng.

Hlauhthawnna
India fan-te hlauhthawn ang ngeiin thil a thleng dawn niin a lang hman. Shikhar Dhawan chuan over 2.1-na lekah a out nghal a, run khat bak a siam hman lo!

Captain Rohit Sharma pawh Men in Blue tan a ding rei thei chuang lo - Over nga pawh an khelh hmain a out a, ball 17-ah run 17 chiah a siam. Mikhual team-in tlangnel an harsat.

Tun hnaia che fuh thei lo Virat Kohli (17 runs) a out khan over 8.1 a ni a, India-in wicket thum an hloh fel der tawh a, run 38 chiah an siam bawk!

A hunah tak
India fans an hlauthawng a, mahse, a hunah tak Rishabh Pant a rawn ding chhuak. Kum 24 mi batsman hian ball 113-ah run 125 a rawn siam a, a tawp thleng a dam - ODI-a century a vuak chhuah hmasak ber a ni.

Wicket-keeper batsman Pant hi Hardik Pandya chuan ṭha zetin a rawn pui bawk a, bowling lamah pawh wicket li latu all rounder hian England lakah ze thup a tum lo.

Pandya hian run 71 rawn siamin Pant a rawn pui a, Men in Blue hian over 42.1 lekah an target um phakin, wicket nga chiah an hloh a, a tawpah wicket ngain India an chak a, series chu 2-1 in an la fel der.

Twenty20 Series (Match thum)
July 7, Ningani Zan
England 148 (19.3 overs) vs India 198/8 (20 overs)
*Run 50-in India an chak
*Player of the match: Hardik Pandya (Ind)

July 9, Inrinni Zan
England 121 (17 overs) vs India 170/8 (20 overs)
*Run 49-in India an chak
*Player of the match: Bhuvneshwar Kumar (Ind)

July 10, Pathianni Zan
India 198/9 (20 overs) vs England 215/7 (20 overs)
*Run 17-in England an chak
*Player of the match: Reece Topley (Eng)

ODI Series (Match thum)
July 12, Thawhlehni Zan
England 110/all out (25.2 overs) vs India 114/0 (18.4 overs)
*Wicket 10-in India an chak
*Player of the match: Jasprit Bumrah (Ind)

July 14, Ningani Zan
England 246/all out (49 overs) vs India 146/all out (38.5 overs)
*Run 100-in England an chak
*Player of the match: Reece Topley (Eng)

July 17, Pathianni Zan
England 259 (45.5 overs) vs India 261/5 (42.1 overs)
*Wicket ngain India an chak
* Player of the match: Rishabh Pant (Ind)
*India-in ODI series chu 2-1 in an la
*ODI hma hian T20 series chu 2-1 thoin an la tawh bawk.
*India hian West Indies nen ODI series (match thum) leh twenty20 international series (match nga) an khel zui dawn a, West Indies-ah an inkhel ang.