EPL center back tawi ber Martinez

Manchester United defender thar Lisandro Martinez hi 5ft 9in a sang a ni - Premier League defender, a bikin a laia khel ṭhin zingah chuan a tawi ber a ni dawn. Tharum hman tamna English league sang berah a theihna fiahin a awm dawn.

Martinez leh Man United an inrem hnu lawkah Erling Haaland hming an lam ri ve bawk. Manchester City striker hming an lam chhan chu club inhal tak player pahnih hi inhmachhawn tur an nih vang a ni.

City striker Haaland hi defender Martinez aiin 8in ngawtin a sang zawk! Ball kang inchuh kawngah chuan Haaland hi a dinhmun a ṭha zawkin a rinawm, chutih rualin season hmasa khan Martinez hi ball kang inchuhah Harry Maguire (6ft 4in) aiin a hlawhtling hnem zawk.

Erik ten Hag-a'n a hmanthiam sa a ni a, season thum hun an hman dun chhungin Dutch league title vawi hnih an la. Italian defender ropui Fabio Cannavaro nen an san zawng hi a inchen chiah, eng ang taka theihna nei sang nge tih en a châkawm tawh hle.