Mahrez tan contract thar

Riyad Mahrez chuan season hnih dain contract a ziak thar. Algeria winger Mahrez hian kum 2025 thleng Manchester City tan a khel dawn tihna a ni a, a ṭul dan anga pawhsei theih tura tih a ni bawk.

Mahrez hian kum li liam ta khan Leicester City aṭangin Man City hi pound maktaduai 60-in a zawm. Etihad Stadium a pan hnuah match 189 khelin goal 63 a khung tawh a, a ṭhiante khung tur vawi 45 a siamsak tawh bawk a ni.

Kum 31 mi Mahrez chuan, "Manchester City ka zawm hnuah hlawhtlinna hrang hrang ka chang tawh, he hmunah hian ka hun hman zawng zawng mai hi a hlimawm vek, contract thar ka ziak thei hi ka lawm hle.

"Season li ka hman liam tak kha theihnghilh theih a ni dawn lo a, kan hmabakah tih tur tam tak a la awm bawk. Nomawi dang chawi châkin kan team hi a la tuihal reng, chutiang mi zinga ka tel thei chu ka lawm bawk," a ti.

Man City a zawm chinah Premier League nomawi leh League Cup pathum ve ve a la tawh a, knock out tournament upa ber FA Cup-ah vawi khat a champion pui tawh bawk - season tharah chuan Champions League an beisei ang.

Tun nipui bazar chhungin Gabriel Jesus leh Raheem Sterling ten City an chhuahsan, tawnhriat nei ṭha leh Pep Guardiola duh dana khel thiam sa Mahrez thlun ngheh theih hi Man City tan tihmakmawh a ni.