MLS-ah Bale a inlan

Real Madrid forward hlui Gareth Bale chuan Major League Soccer club Los Angeles tana a match hmasa ber a khel a, nimin khan 2-1 a Nashville SC an hnehna inkhelah bench aṭangin minute 72-naah luhtir a ni.

Bale chuan, "A nuam takzet - bench-a ka awm rual khan ka club tana tha thawh ka châk nghal a, ka tana pawimawh ber chu in fit chhoh zel hi a ni.

"Europe-ah season tawp lam a ni a, chuvangin minute tlemtê tal khelh hi ka tan a ṭha a, a pawimawh ber erawh point thum kan hmuh hi a ni," a ti.

Bale hian Real Madrid-a a contract a hman zawh hnuin LAFC hi free transfer-in a zawm a, thla 12 chhung atan contract ziakin, a ṭul dan a zira kum 2024 thleng cham thei tura tih a ni.

Welsh forward chuan, "He hmunah hian hahdam tura kal ka ni lo. He team tana a tam thei ang ber tha thawh hi ka duh a, hnehna chan zel a, nomawi chawi hi ka duh a ni.

"LAFC tana ka match hmasa ber ka khel thei hi ka lawm takzet a, fitness ti ṭha zelin, ka team ka puih zel theih ka beisei," a ti a, khelmualah a luh tirhin movement mawi zet vawi hnih a pholang - a la thiam reng e!

Bale bakah hian Italian defender Giorgio Chiellini pawhin LAFC tana a match hmasa ber a khel a, Juventus legend hian inkhel bul a ṭan.

MLS Western Conference-ah LAFC hian hma an hruai mek a, July 24, zing dar 6:00-ah Sunil Chhetri club hlui Sporting Kansas City nen an inkhel ang.