Ngaih lai Wimbledon, i tel lo chuan...

Season tin khelh a ni ṭhin chung pawhin a ngaihawm hman viau zel a, kumina an khel thei lo tur phei chu Wimbledon ngainatute tan khua a har vawng vawng - grass court inelna lian leh ropui en leh tur chuan kum khat dang nghah leh a la ngai.

'Ta se' - Covid-19 vangin Indopui II-na hnua a vawi khat nan Wimbledon hi ṭhulh a ni a, tuna kan sawi theih chin chu hri leng loin tournament khel pangngai ta se tih a ni mai awm e, khel ta se chuan champion kan hre tawh ngei ang.

The Championships, a sawi lar nana Wimbledon an tih hi an khelhna hmunpui ber chu Centre Court a ni. Tennis court hmingthang hi 1922 aṭang khan hman ṭan a ni tawh, 2009 khan siamṭhat niin tunah hian mi 14,979 an ṭhu thei.

Tennis court dangte aia lian fal bik a ni lo a, amaherawhchu tennis tournament upa ber an khelhna hmun pawimawh a nih avangin ngaihhlut a hlawh - mi challangte ṭhutna tur bik 'Royal Box' an siamte chu infiamna chauh ni loin media hrang hrang chaw tui pakhat a tling.

Centre Court-ah inkhel a awm a nih chuan entu an ṭhahnem ṭhin a, an khat tlangpui. Infiamna dangte angin tennis-ah chuan fans bengchheng leh au hulh hulh awm lo mah se an ṭan zawngte an thlawp zia lantirna thawm chu thup theih a ni ngai chuang lo.

British mi, a bik takin Wimbledon final entu hi an puitling ṭhin viau - an ṭan loh zawkin point an hmu a nih pawhin lawmpui nan kut an beng ṭhin tho. Kuminah erawh hlim leh lawm thawm ri hriat tur a awm lo, a reh vawng vawng. Hla phuahtuin, "A ngui, a hlui, a chul riai e..." a tih ang kha a chang zo ta.

Centre Court hlut bik zia sawi nawn a ngai lo a, he hmuna player an ngainat leh ṭan rawn ber chu Roger Federer a ni. Swiss star hi a inkhel tawh a nih chuan 'Roger, Roger, Roger' tiin mipui an aurual ṭhin; a khingpuite tan hriat nuam a ni lo ang.

Federer hian Grand Slam nomawi 20 a chawi tawh a, chung zinga pariat chu Wimbledon title a ni. Inelna a awm thei dawn lo tih an sawi chian hnu lawk khan Federer chuan, "Beiseina thamral," tiin a ui thu a lo sawi tawh.

Tun dinhmunah Federer hi inkhel thei loin a chawl mek. Season dang anga Wimbledon khelh hun a rawn her chhuah chuan a lung a leng a, tun hnai mai khan inelna a ngainat leh a chet ṭhat ṭhinna ber hmun hi a ngaih thu a sawi chhuak.

Federer chuan, "Wimbledon ka ngai takzet, tennis khawvelah chuan engkim min petu a ni. Centre Court-ah inelna hmachhawn ngei ila, chutah chuan hlimna vawr tawp chu a awm si. Season thara Wimbledon ka khelh leh ngei theih nan tun aṭangin training ka nei ngawrh hle," a ti, season tharah Roger Federer lo chang rawh.

June thla tawp leh July thla chawhma lam hi chu season dangah chuan British media tan 'Wimbledon' hi an chaw tui a ni ṭhin. Kuminah erawh ziah tur an nei lo, media lian leh rintlak BBC pawhin an website kaltlangin Wimbledon final ropui an tih chu mipui thlan turin an chhawp chhuak.

Mipui vote aṭanga a lan danin Roger Federer leh Rafael Nadal ten 2008 final an khelh chuan ngaihhlut a hlawh a, vote tla 39% hmuin an dah sang ber. Pahnihnaah 2013 final-a Novak Djokovic vs Andy Murray inkhel (19%) leh 1980 final-a Bjorn Borg vs John McEnroe intawng (17%) a awm.

Kum 2008 July 6, Pathianni tlai a ni a, Wimbledon final khel turin Roger Federer leh Rafael Nadal an rawn pen chhuak. 2006 leh 2007 final-ah pawh player ropui pahnih hi an intawng, a zawna a kum thum nan final an khel tihna a ni.

Darkar li leh minute 48 an khelh hnuah Nadal-a'n 6-4, 6-4, 6-7 (3-7), 6-7 (8-10), 9-7 a hnehna changin a vawi khat nan Wimbledon champion a ni. Spanish tlangval chuan, "Ka lawmna hi thua sawifiah theih a ni lo. Chutih rualin Roger erawh number 1 a la ni reng," tiin title a lak hnuah a sawi.

Federer chuan, "Ruah sur vangin vawi hnih kan chawl a, chumi hnuah chuan ka service min chhuhsak. Ka ball vuak a nat lutuk vanga ka tih fuh tawk loh lai leh Nadal ropui taka a khel lai kha ka theihnghilh thei lo," tiin nikum khan a lo sawi chhuak tawh.

Rafael Nadal a hneh loh aṭanga thla 12 a liam leh chuan Roger Federer-a'n ropuina a hlawh chhuak leh - 2009 final khan Andy Roddick chu 5-7 7-6 (8-6) 7-6 (7-5) 3-6 16-14 in a hneh. Grand Slam nomawi 15 a lakna chiah a ni a, legend Pete Sampras-a record (14 titles) a khumna chiah a ni bawk.

American tlangval service nei ṭha chungchuang Roddick leh Federer an inkhel tawk hle a, set hnuhnung berah pawh an inthlau lo. Mahse, Swiss star-in match point a hmuh hnuah Roddick chuan forehand na lutuk neih a tumna lamah ball a vaw sual - Roger tan lawmna a ni thung.

Kum 38 mi Federer hian Wimbledon nomawi pariat a kawl khawm tawh a, ani aia record ṭha an awm lo. Season hmasa mai pawh khan final a la thleng, match point a hmuh a chhawr ṭangkai theih loh avangin Djokovic lakah a vanduai mai a ni; nakkumah pawh a thiam a la theihnghilh lo ang.