Tlai dar 3:00-ah LBS Suzuki All Mizoram Inter Village Football Final Sialhawk Vs Champhai Kanan

Team 204 tehmeuh telna LBS Suzuki All Mizoram Inter Village Football Tournament 2022 final chu vawiin tlai dar 3:00 hian Lammualah Sialhawk VC leh Champhai Kanan VC ten an khel dawn.

Tualchhung football ngainatuten Sialhawk 'fit' zia an sawi nasa a, Champhai Kanan erawh an thiamzia an sawi thung. Tu nge ṭha zawk tih chu vawiin tlai hian chinfel a ni dawn a, a pui keih keih khawp ang.

Mipui an pui
Entu ringawt pawh hi hmuhnawm tham an tling dawn. Lammual khat mipui punkhawm harsatzia an sawi fo ṭhin a, Inter Village Football-ah erawh an khat hma ṭhin hle - an leng lo lam hret a ni zawk.

Mipui pungkhawm ringawt pawh hi hmuhnawm tham an ni a, ṭan lam neia an han au chiah phei chu ropui tak a ni. Nuamsa taka inkhel en tur tan inpek hret a ngai dawn!

Kick off hi dar 3:00 ni mah se closing ceremony chu tlai dar 2:30-ah an ṭan tawh dawn a, tlai dar 2:00-ah chuan ṭhut fel a pawimawh tawh ang. Aizawl khawpuiin a zir miau loh avangin traffic a jam palh thei, parking-na hmun a ṭhat tawk loh avangin public transport hman a finthlak bawk ang.

Champion thiam Danmawia
Sialhawk hian Mizoram pum huap ang chuan sulhnu ṭha sawi tur an nei lo a, amaherawhchu Tuichangral inelnaah chuan an champion fo. Tun ṭum inelna an hmachhawn hma pawh hian Tuichangral inelnaah an champion a, Khawhai Zone-ah an champion fo tawh.

Hei aia pawimawh chu champion ṭhang captain an nei - R. Laldanmawia aia Mizo zinga champion ngun hi an awm bik kher lo ang. Danmawia hian veng/veng leh khua/khua inelnaah Durtlang leh Chanmari chu Red Ribbon Football-ah a champion pui tawh a, Ramhlun South chu NECS Cup-ah a champion pui tawh bawk.

MPL hmasa berah Danmawia hi best player a ni a, Dinthar a champion pui. I Day Football-ah Dinthar leh a inzir chhuahna 1st Bn MAP Academy a champion pui tawh bawk. Santosh Trophy champion team player pawimawh a ni a, National Under 16, Dr T Ao Trophy leh NorthEast Games-ah Mizoram a champion pui tawh bawk.

I League-ah ni se Aizawl FC a champion pui a, Calcutta Football League-ah pawh East bengal a champion pui tawh a, 2018 Intercontinental Cup-a India champion ṭumin a tel bawk.

Sialhawk captain Danmawia chuan, "Champion nomawi ka lo chawi ve fo tawh a, Sialhawk tana Mizoram pum huapa champion erawh ka châk takzet. Sialhawk-ah chuan innghahna tak tak ka ni a, khua leh tui dik tak ka ni a, kan thlen chin hi a ropui a ni," tiin Sialhawk champion ta se, a hlutna chu thua sawifiah chi a nih loh thu Vanglaini a hrilh.

A vawi khatna
Champhai Kanan tan tun ṭum inelna hi Mizoram pum huap veng/veng leh khua/khua inelnaa an vawi khat telna a ni a, mah se an vawi khat telna aṭanga teh chi an ni lo. Final thleng tur hian team ṭha ṭhahnem tak an hneh tawh a, Sialhawk aiin an kalkawng a hautak zawk.

Champhai Kanan hi an vanneih vanga tun hun thleng hi an ni lo a, an thiam vang a ni. MFA Cup-ah Champhai club FC Vengthlang North an champion a, Saitual-a inelna neihah hian tuna Champhai Kanan player Lalramsanga, Jessie Lalmawizuala, R. Ramdinthara leh Laltlanzova-te player pawimawh an ni - Ramsanga hi best player atan thlan a ni bawk.

Champhai chhung Inter Village football inelna Upa C. Keikhuma Memorial Trophy-ah Kanan hian last 16 chauh an thleng a, an hneh loh erawh champion zui ta Melbuk an ni. Tun ṭum inelnaah Melbuk hi 2-1 in an hneh let a, Champhai champion hnehtu an ni.

Hei chauh hi a ni lo, kum 2019 Rii & Hawla Trophy (Champhai district inter village) ah Kanan hi an champion a, inkhelh thiam veng an ni ve hrim hrim.

A hmuhnawm dawn
Champhai hian passing game football an khel a, Ramsanga'n fing taka ball semin Tharpuia leh a nau Zozoa te tlarhmaah an hlauhawm a, hetiang karah hian midfielder thawkrim JH Remlala ṭhatna hmuh hmaih a thiang lo.

Champhai captain C. Lalchhawnkima hi a hminga armband hreng ve satliah a ni lo a, captain dik tak leh team hotu a ni.

Kimkima hi Vanramnghaka nen inkawpin tlarhnung an tiphui ṭha a, Aizawl FC baka I League club hrang hrang tawnhriat nei tawh a nih avangin team tan a hlu takzet. Final an thlen theih nan KimKima hian chakna goal a khung a, best player atana thlan awm ber zinga mi a ni.

Sialhawk lamin Danmawia an kawl a, ani pawh hian best player a phu viau bawk. Chutih rualin Sialhawk erawh team anga an ṭanrualna hi an ṭhatna a ni a, ball pet thiam Crespo Vanlalhriatpuia'n midfield aṭanga ball semin tlarhmaa awm Danmawia (10 goals), Rotluangliana (5) leh Vanlalremruatpuia (5) ten goal thun an thiam thung. Tun inelnaah goal 36 an khung tawh a, Sialhawk hi dah hniam chi an ni lo.

Sialhawk coach hi Danmawia u Lallungmuana a ni a, team chhung a hre chiang hle. Champhai Kanan coach H. Lianthanga (Mapuia) hi an khaw mipuiin an thlawp ṭha bawk.

Final hruai thleng thei coach pahnih an fakawm a, final-ah tuin nge pressure zo zawk dawn tih chu hunin a hril ang.

Khual ṭha thlengtute
Sialhawk hi Bethlehem Vengah an thleng a, Local Coucil leh Branch YMA ten an mikhualte hi an duat thiam hle. YMA Information Centre aṭangin Sialhawk ṭan turin an au a, final-ah pawh ṭawiawmtu an nei ṭha ang.

Champhai Kanan pawh football ngaina veng Electric Vengin an thleng a, an thlenna hmunin a zir bawk a, thilpek pawh an dawng ṭha. Branch YMA leh Local Council-in an ṭawiawm ṭha a, an khaw mipui entu awm ta miah lo pawh ni se ṭantu an ngah dawn.

Finalist thlengtute hi MPL club nei veng an ni ve ve a, football-ah mi thar an ni lo.

Top Scorer
Goal khung tam ber hi first round aṭanga en ṭan tur a ni dawn a, goal 11 khung thei hi Champhai Kanan forward R. Ramdinthara leh Armed Veng South forward Lalnunsanga (Tale-a) te an ni.

Goal khung tam dan inangah a thleng sang zawk en tur a nih avangin Tale-a chuan top scorer chawimawina hi a dawng thei tawh dawn lo. Hemi a nih avang hian Tharpuia elpui ber tur chu Sialhawk forward R. Laldanmawia a ni dawn.

Sialhawk captain Danmawia hian goal 10 a khung tawh a, goal khat a khung belh leh chuan Tharpuia nen an goal khung zat a inang ang. Player pahnih hi an goal khung zat a inang a nih chuan joint top scorer an ni dawn.

Final Thlirna Tawi
Vawiin Inkhel Tur
Sialhawk VC 3:00 PM Champhai Kanan VC
Semifinal-a starting XI
Sialhawk VC
1. TC Ramnundanga (GK); 13. Lalmuankima, 22. Lalchhanpuia, 12. Lalramhluna, 20. Lalfamkima; 7. Crespo Vanlalhriatpuia, 14. Lalhmangaihsanga, 16. Vanlalbiakdika; 9. Vanlalduata, 10. Rotluangliana, 17. R. Laldanmawia (C).

Champhai Kanan VC
1. Zosangliana (GK); 20. V. Lallawmkima, 24. Vanramnghaka, 13. C. Lalchhawnkima (C), 3. F. Malsawmzuala; 17. Lalramsanga; 10. JH Remlala, 5. Jessie Lalmawizuala; 9. R. Ramdinthara, 25. Laltlanzova, 8. H. Lalmuankima.

Final atan ruahmanna
LBS Suzuki Inter Village Football Tournament final chu July 19, 2022 chawhnu dar 3:00 hian Lammualah khelh a ni dawn.
1. Ticket hi mi pakhatah Rs 50 a ni. Chawhma dar 11 aṭangin zawrh ṭan a ni ang a, Lammual main gate hnaih lutuk loah hmun li-ah a zawrhna siam a ni ang.

2. Main gate leh a chhehvelah chuan ticket lei tawhte chiah awm theih a ni ang.

3. Official pavillion-ah card nena sawm bik te, VIP, sponsor leh co-sponsor bakah MFA leh DFA official-te chiah ṭhut theih a ni dawn a, final atan mi sawm ṭhahnem tak an awm avangin hetiang mi ni lo chu official pavillion lama kal lo tura ngen an ni.

4. Final function hi dar 2:30-ah ṭan a ni dawn a, hei vang hian inkhel en tumte chu dar 2:30 hmaa khelmuala lut hman tura ngen an ni a, hei hi inkhelh ṭan dawna mipui an inbawh buai lohna tura ruahman a ni.

5. Sialhawk VC team ṭantute chu Lammual chhim lama K Kawla Stand leh S Malsawmtluanga Stand-ah ṭhut tur a ni. Champhai Kanan VC team ṭantute chu Lammual hmar lama Zomuanthanga Stand leh Zohminga Zote Stand-ah ṭhut tur a ni ang.