Vawiin aṭangin CYMA Volleyball
D3 Amrit Cement 22nd Inter Branch YMA Volleyball Tournament chu vawiin aṭangin R. Dengṭhuama Hall, Mualpuiah khelh a ni dawn. Inkhelh hi LPS-ah pekchhuah a ni dawn a, chawhma dar 10:00 aṭangin an ṭan ang.
July 15, Zirtawpni zan khan CYMA Hall, Tuikhuahtlangah inelna khuh hawnna Spike Off neih a ni a, inelna hi mipa leh hmeichhe inelna a ni ang. Tun ṭum inelnaah hian mipa team 104 leh hmeichhia team 39 an inlan dawn a, an vaiin team 143 an tel dawn.
Mizo tan CYMA
Inter Branch YMA Volleyball Tournament hi Central YMA leh Mizoram Volleyball Association ṭangkawpin an buatsaih a ni a, Organising Committee chairman leh CYMA Sports Sub Commiittee chairman R. Lalrinmawia (Marina) chuan, "Central YMA hian Mizoram sports hmasawn nan theihtawp a chhuah ṭhin. Football, Volleyball, Cricket, Basketball, Chess leh inelna hrang hrang a buatsaih tawh ṭhin a, Mizo ṭhalai infiammite tan theihtawp a chhuah chhunzawm zel dawn," tiin a sawi.
Marina chuan sawi chhunzawmin, "Volleyball hmasawnna atan tun inelna hi buatsaih a ni. Chumi piah lamah YMA member-te intihhlimna tur a ni tih kan hriat a ṭha a, inelna hi YMA hruaitute leh member-te inpawhtlanna ni thei se tih hi kan duh dan a ni. Branch YMA tel zawng zawngte mahni member dik tak nena rawn thawk chhuak turin kan inngen a, Team ṭawiawmtu YMA member-te pawh YMA tih a mawi a chetzia pho lang turin kan in ngen e," tiin Vanglaini a hrilh.
CYMA hian nikum khan Covid-19 hri leng vangin inelna lian tham a buatsaih thei lo a, Online Chess inelna chiah a kalpui. Kuminah erawh Covid-19 hri lengin ziaawm lam a pan a, Cricket inelna a buatsaih. CYMA Cricket inelnaah hian Ramhlun Venglai chuan final-ah Durtlang hnehin an champion.
Volleyball hun
Mizoram Volleyball Association-in hlawhtling takin Pro Volleyball League a buatsaih tawh a, entu an ṭhahnem ṭhin hle. Tun ṭum CYMA Volleyball pawhin ngaihhlut a hlawh dawn.
Inkhel en man hi Rs 20 chauh a ni dawn. Mizoten tun hnaiah faina kawngah hma an sawn tih a lang a, All Mizoram Inter Village Football leh Mizoram Super League neih zawh takah team chauh ni loin mipuite zingah an hnu hma fai taka kalsan an ṭhahnem hle.
Mizoten fai an tlin tih a lang a, CYMA Volleyball-ah pawh Mizo mipuiten an chhunzawm a pawimawh takzet.
Inelna chu
Inelna hi R. Dengṭhuama Hall, Mualpuiah khelh a ni dawn a, hall-ah hian court pathum a awm. Chawhma dar 10:00 aṭangin inelna ṭan ṭhin a ni ang. Match khat khelh zawhah match hnihna khelh chhunzawm nghal tur a nih avangin team tel turte tan tlai a thiang lo.
Mipa inelnaah team team 104 an tel a, hemi a nih avang hian mipa inelna aṭangin ṭan a ni dawn. Ni hnih chhung chu mipa inelna chauh khelh a ni dawn a, hmeichhe inelna chu July 21, Ningani aṭangin khelh ṭan a ni chauh ang.