Sialhawk "Unzi Lasi"

Mizoram huap football tournament-ah final an lut miau a, an tan sawi ngaihna a awm lo. Tournament tir aṭangin an phur tawh a, an phurna sang zual zelin semifinal an thlen meuh kha chuan ram pum huapa an boruak chim chin chu sang tak a ni tawh.

Inkhel en turin Aizawla Sialhawk khaw chhuak awm sate an kalkhawm ṭhin a, round sang zawk an thlen chinah phei chuan an khua aṭangin inkhel en tur liau liauin Aizawl an pan khawm, nimin pawh khan Bus leh Sumo bakah mimal motor hmangin final khelhna tur hmun an rawn pan.

Sialhawk Village Council (VC) secretary Zonuntluanga chuan, "Unzi Lasi hi khawtual ṭawngkam a ni a, khaw hrang hrangin ṭhianho infiam nan leh inbiak nana ṭawngkam an hman ṭhin ang pakhat kha a ni ve mai.

"I dam em? Aw ka dam e? I ṭha maw? Aw ka ṭha e? Hetiang sawina hi a ni vek. He thumal hian a hranpain awmzia a nei bik lo a, chutih rualin eng sawi nan pawh a hman theih vek, a hmangtu leh a dawngsawngtuin a man dan a zirin a hman theih vek," tiin Vanglaini a hrilh.

VC hnen aṭanga Vanglaini thudawn danin, tun dinhmunah Sialhawkah hian chenna in 500 vel a awm, chhungkua 542 niin mihring 2,500 vel an khawsa mek.

Tun hma chuan Champhai district an ni ṭhin, tunah erawh Khawzawl district an ni tawh.

Sialhawk hian tun hma chuan khelmual puitling an nei ngai lo, kumin khan a sir ṭhenkhat hnawh khatin an tizau a; 11vs11 inkhelh theihna khelmual an nei ve chiah - tualchhung player football thiam erawh an nei loh phah lo.