Champhai Kanan an phûr

"Mizoram khawpui chu Aizawl a ni a, Zokhawpui chu Champhai a ni," an ti ṭhin. Aizawl aṭanga Champhai khaw luh tawntirhah Kanan Veng a awm - Champhai Kanan VC hian vawiinah Lammual luah khah an tum.

Aizawlah Champhai mi tam tak an awm sa - Kanan Veng mi ni kher lo pawhin an khua hi an ṭan vek dawn. Tournament en tur hrim hrima Aizawl rawn pan pawh an tam, nimin thleng khan final en tum an la kal khawm zel.

Khawtlang hruaitute hnen aṭanga thu dawn dan chuan, nimin khan bus pahnih, sumo pakhat bakah mimal car leh two wheeler ṭhahnem takin an rawn kal. Sialhawkin fans an ngah tih an hria a, final-ah tlem zawk nih an tum lo.

Champhai Kanan VC secretary H. Lalenkawla chuan, "Final en tur bik hian Champhai aṭangin mi 150 vel an rawn chhuak, semifinal ai chuan entu pawh kan tam lehzual dawn. Hei bakah hian kan Community Hall-ah CCN chuan live a en theihna an lo buatsaih dawn bawk.

"Champhai huam chhung inelna chu kan hmachhawn tawh ṭhin, ram pum huap erawh kan hmachhawn vawi khatna a ni. Champion chu kan tum ber ni mah se, kan player ten mi hriat an hlawh a, khelhna tur club an hmuh phah theihna hi kan duh ber," tiin Vanglaini a hrilh.

Champhai Kanan huam chhungah hian chhenna in ding 630 vel a awm a, chhungkua 800 bawr aṭangin mihring 4,500 bawr an cheng mek. Khelmual puitling an nei lo, 6vs6 a khelhna an neih chu Futsal khelhna tura ruahman mek a ni.