LBS Suzuki All Mizoram Inter Village Football

Sialhawk hian ṭawngkam danglam deuh taka thil sawi an nei leh ṭhin. A pawl pawh hi a 'Dur' an ti! Kawr dur hatu Lammualah an tam thei hle, vawiinah pawh an pasalṭhate au phur turin Sialhawk fa hrin an pungkhawm leh dawn.

Champhai Kanan lam rawng tur chu a var a ni thung. Inrinni khan Lammualah kawr var ha an tam, vawiinah an tam leh zual ang. Fans hi player 11-na tia sawi ṭhin an ni, player tluk zetin an pawimawh dawn.

Mipui an tam em avangin ṭhutna a indaih lo a, remchang lai zawn mai a ngai ṭhin. A hmuna en ngei duh an tam bawk si, rualrem lo leh harsa taka en an awm ṭhin, chetsualna a thlen loh nan mitin kan fimkhur a ngai.

Luammualah mipui an khat vek zel. Chhim lam gate aṭanga luh thlakin, khelmual sirah thing a ding - inkhel entu tam tak a hliah ṭhin, a lian tual tual ang a, entu mipui a hliah hnem tial tial ang. Co-sponsor Tata Yodha lam lirthei 'display' pawh entute remchang a ni zel!