Volleyball inelna lian an ṭan ; Vawiinah an chhunzawm dawn

Mizoram pum huap volleyball inelna - D3 Amrit Cement 22nd Inter Branch YMA Volleyball Tournament chu nimin aṭang khan R. Dengṭhuama Hall, Mualpuiah khelh ṭan a ni a, ni khatna aṭangin inkhel a hmuhnawm nghal hle.

R. Dengṭhuama Hall-ah volleyball court pathum siam a ni a, ṭum khatah match thum zel an khel thei. Vawiin pawh hian a hmun ngaiah chawhma dar 10:00 aṭangin inkhel a awm chhunzawm leh dawn, a duh tan a hmunah en theih a ni.

Inelna hi mipa leh hmeichhe tana tih niin, mipa huangah team 104 zet an tel. Hmeichhe inelna erawh July 21, Ningani aṭanga khelh a ni dawn. Inkhel hi LPS Vision chuan live-in an pe chhuak ṭhin dawn a ni.

Nimin inkhelah Hlimen an inlar nghal, tualchhung volleyball player nei ṭha team hian Vaivakawn chu 3-0 (25-21, 25-12, 25-18) in an hneh a, court number 1-a inkhel dangah Chaltlang, Tualcheng leh Mualpui te pawhin hnehna an chang ve bawk.