All India Junior Ranking Badminton Mizo rawltharin an khel dawn

Yonex Sunrise All India Junior Ranking Badminton Tournament 2022 khelh mekah H. Lalṭhazuala chuan main draw a invaw tling a, Chanmari West rawlthar hian inelnaah hian qualifying aṭanga bul ṭanin mi pali a hneh a ni.

H. Lalṭhazuala bakah hian Saitluangpuia chuan inelna hi main draw aṭangin a hmachhawn dawn a, Ramhlun Venglai rawlthar erawh qualifying khelh ngai loa tlingsa a ni - Mizo zingah national ranking tournament-a main draw a tling nghal thei awmchhun nia hriat a ni.

India Under-19 ranking-a 19-na ni mek Saitluanga hian tun thlatir khan National Junior Ranking Tournament, Panchkula-a neihah ropui takin main draw a invaw kai a, ranking a neih phak hial avangin tun inelnaah hian main draw a tlingsa a ni - a record hi a chhuanawm hle.

July 15 aṭanga neih ṭan inelnaah hian Mizo naupang pariat ngawtin inelna an hmachhawn a, Mizo naupangte hruaitu, Pullela Gopichand Badminton Academy coach ni bawk Lalhlimpuia (Puipuia) chuan, "Mizo naupangten hma an sawn a, he laia player ṭhate nen pawh an inkhel tawk viau tawh," a ti a, main draw invaw kai vek lo mah se hmasawnna a awm thu a sawi.

Mizoram Badminton Association (MBA) chuan thuchhuah siamin, Mizo naupangte chu an kalzelna turah duhsakna an hlan.