Ibra a la chawl dawn lo

Kum 40 mi ni tawh mah se Zlatan Ibrahimovic-a'n inkhelh chawlhsan mai a la tum lo a, Swedish striker ropui hian AC Milan-ah kum khat dang cham chhunzawm turin contract thar a ziak leh ta.

Ibra hian October 3-ah kum 41 a tling tawh dawn a, kum 40 a pelh thlengin European top five league-a top division-ah a la inkhel dawn tihna a ni - a nep lo hle.

Chutihrual chuan Swedish striker hi a kum a tam tawh avangin hliamin a tlakbuak ve deuh reng a, May thla khan a khup hliam chu zai a ni - thla riat a chawlh dawn avangin Milan tan season tharah a inlan lawk lo ang.

Ibra hian a khup hliam avang hian thla ruk chhung chu a mut mumal loh thu a sawi a, season hman zawh takah khan Milan tan hian inelna hrang hrangah match 27 khelin goal riat a khung - assist vawi thum a nei bawk.

Swedish club Malmo FF aṭanga a professional career ṭantu hian December 2019 khan AC Milan hi a career-a a vawi hnih nan a zawm a, match 20-ah goal 11 a khung nghal.

2020-21 season-ah pawh khan match 27 khelin goal 17 a la khung a, a kum tam deuh tawh mah se a thiam a la theihnghilh lo - season hman zawh takah Serie A nomawi a chawipui leh a, hemi hmaa league-a an champion hnuhnun ber 2011 khan Milan tan hian a la khel!

Sweden tan match 121 inlana goal 62 khung thei striker hian Malmo bakah Ajax, Inter Milan, Barcelona, Paris Saint-Germain, Manchester United leh LA Galaxy tan a lo khel tawh a, a nomawi chawi tawh ringawt pawh ziah fe tham a tling.

European top five league-ah, goalkeeper tih loh player zingah kum 40 chuang player pahnih an awm a, Ibra bakah hian July 21-a kum 41 tling tur, Real Betis captain Joaquin chuan kum khat dang La Liga khel turin contract thar a lo ziak tawh a ni.