Manchester United chhandamtu Maguire

FA Cup semifinal hmasa berah Manchester United-in player 10-a khel Norwich City chu extra time an khelh hnuah 2-1 in an hneh hram. Carrow Road-ah hun pangngaiah 1-1 a an inhnehtawk hnuin extra time minute 118-naah captain Harry Maguire-a'n chakna goal a khung. 

Inrinni zan inkhelah Norwich manager Daniel Farke-a'n team ṭha a luhtir a, Everton an hneh loh ṭum aṭangin player pathum chiah a thlak. Toffees nena bul ṭan lo, United khelh ṭuma bul ṭantute hi club top scorer Teemu Pukki, goal khung tam pahnihna Todd Cantwell leh inlan tam lama parukna Emi Buendia te an ni a, Wembley Stadium thlen phak an tum hle.

Manchester United erawh FA Cup ngai pawimawh mah se season thara Champions League khelh phak an tum avangin player an siksawi nual a; rinrawl zingah captain Maguire, Luke Shaw leh Bruno Fernandes ten bul an ṭan.

First half-a goal a luh loh hnuah Odion Ighalo-a'n goal hmahruai minute 51-naah a khung a, United ngaih a ṭha. Amaherawhchu Canaries tan Todd Cantwell-a'n minute 75-naah box pawn aṭangin a pet goal a, Sergio Romero-a'n a tih tur a ti tawk lo.

Ole Gunnar Solskjaer hoten goal khung an harsat a, minute 88-naah Norwich defender Timm Klose-a'n box pawn chiahah Ighalo a tih tluk avangin hnawhchhuah a ni. Portuguese midfielder Bruno Fernandes-a'n an freekick hmuh hi goal-ah a chantir thei lo.

FA Cup-ah hian hun pangngaiah player panga a thlak theih a; bench aṭangin Paul Pogba, Marcus Rashford, Mason Greenwood, Nemanja Matic leh Brandon Williams te lutin chak an tum hle. Goal an khung theih chuang loh avangin extra time-ah Sheffield United lama hattrick siamtu Anthony Martial a lut.

Norwich-in keeper Tim Krul an kawl a, penalty thlenpui ngei tumin goal venhim hna an thawk a, United player-ten ṭhiah ngaihna an hre lo. Minute 118-naah United an vannei a, Pogba-a'n fing takin box chhungah pe lutin Norwich player talbuai karah Maguire-a'n chakna goal a khung.

Manchester United manager Ole Gunnar Solskjaer chuan, "Knockout hi chu a danglam. Kan khelh dan a ṭha thawkhat a, chutihrualin kan goal bawh erawh a na tawk lo a, chance kan insiam tam tawk lo. Team ṭha pali zinga kan tel hi ka lawm a, Harry Maguire-a'n chakna goal a khung kha ka lawmpui hle," tiin a sawi. Nizan khan FA Cup quarterfinal match thum dang khelh a ni a, semifinal fixtures pawh (draw neih) a ni nghal bawk ang.