ODI aṭangin Ben Stokes a chawl dawn

England cricketer ropui Ben Stokes chuan one day international a chawlhsan tur thu a puang a, nizan khan South Africa nena an inkhelah ODI-a a match hnuhnung ber a khel - he thu buatsaih a nih lai hian result kan hre hman lo.

Kum 31 mi all rounder hian kum 2011 khan England tan ODI-a a match hmasa ber a khel a, match 104 England tana inlan zuiin run 2,919 a siam a, century vawi thum vaw chhuakin, wicket 74 ngawt a la bawk.

Stokes chuan, "Format thuma inkhelh vek chu ka tan a harsa ta deuh a ni. Thutlukna siam harsa tak a ni a, ka ṭhiante nena England tana kan inkhelh minute tin kha ka ngaihlu em em vek - zinkawng hlimawm tak kan zawh ho a ni," tiin a sawi.

April-a England-in Test cricket captain atana an ruat Stokes hian red ball inelnaah captain hna a la chelh chhunzawm dawn a, Twenty20 cricket pawh a la khel zel ang.

Stokes chuan, "Thutlukna siam harsa tak ni mah se, ka ṭhiante tan 100% ka pe thei tawh lo tih inhre reng chunga khelh luih kha a harsa zawk. England kawr hatu chuan an theihna zawng zawng an hlan tur a ni," a ti.

England and Wales Cricket Board-a chief executive lailawk Clare Connor chuan, "Format tinah player ṭha chungchuang a ni a, chutihrual chuan a thutlukna hi ka hrethiamin ka zah em em a ni," tiin a sawi.

Stokes hian 2019 Cricket World Cup-ah khan England a champion pui a, final-ah out loa run 84 siamin man of the match-ah thlan a ni hial.