Commonwealth Games khel tur Remsiami

Lalremsiami Hmar chu Commonwealth Games 2022 khel tur zinga thlan a ni. India hmeichhe hockey team hian Spain aṭangin inelna neihna tur hmun Nottingham, England an pan tlang dawn a, tournament ṭan hmain inbuatsaihna an nei ang.

FIH Hockey Women's World Cup khelh zawh takah India hian beisei an phak lo, captain leh tawnhriat ngah ni bawk Rani Rampal tel loin knock out round an lut phak lo, tun ṭumah hian hmasawn an mamawh dawn.

India hmeichhe hockey team puan a nihin Remsiami hming a lang ta zel. Mizo nula hian India tan tournament pawh a khel hnem ta malh malh hle a, tun ṭumah pawh hian tlarhma lamah mawhphurhna pawimawh a luah leh ang.

Hockey India chuan Hockey Mizoram hnenah Lalremsiami an thlan thu hi lehkha an thawn tawh, squad hi puanzar la ni chiah lo mah se Mizo nulain Commonwealth Games a khel dawn tih hi chu a chiang tawh a ni.

Kolasib nula Remsiami chuan, "World Cup-ah duh angin kan khel ṭha tawk lo, kan thlen china lungawi mai tur kan la ni lo, hmasawnna tur kan la ngah hle. Commonwealth Games atan hian kan thawkrim chhunzawm hle.

"Mimal tak pawhin insiamṭhat ngaihna ka nei, goal khung theihna remchang ka hmuh ka hlah hnem. Kan duh leh ruahman angin engkim a kal vek thei bik lo. Ka teammate ṭha tak takte nen hian ram tan theihtawp kan chhuah ang," tiin Vanglaini a hrilh.

Kum 22 mi Remsiami hian India senior team tan match 92 a khel tawh a, goal 28 a khung tawh. Hliam leh harsatna dang lian takin a tlak buak a nih loh chuan ram tan match 100 a khel tling ngei ang.

India hian an match hmasa ber atan July 29, Zirtawpni hian Ghana an hmachhawn ang.

Commonwealth Games 2022-ah hian Mizo rawlthar Jeremy Lalrinnunga pawh India tan a inlan dawn. Youth Olympic gold medalist hian inelna neihna tur hmun Birmingham a thleng tawh a, a chesual viau a nih loh chuan medal a lak ngei beisei a ni.