Nadal-a'n training a zawm

Rafael Nadal-a'n dul hliam vangin Wimbledon a khel zo thei lo a, semifinal khelh dawnah a inhnukdawk. Spanish star hian tun kartir aṭang khan tennis training a zawm leh thei tawh, tournament a khelh hun tur erawh sawi theih a la ni lo thung.

Grand Slam vawi 22 champion tawh Nadal-a'n kuminah Australian Open leh French Open nomawi a chawi a, grass court inelna lian Wimbledon title beiseina pawh a sang hle, mahse hliam vangin a duh angin a khel thei lo.

Grass court season a zo a, tunah chuan hard court season an hman chhunzawm leh dawn. Grand Slam hnuhnung ber US Open-ah Nadal hi a inlan theih beisei a ni a, chutihrualin a dinhmun tur a la sawi theih loh.

Wimbledon champion hlim Novak Djokovic erawh US Open atan a dinhmun a la chiang lo. Tuna United States inkaihhruaina danah chuan, ram pawn mi zin lut tur tan chuan hripui leng laka invenna lak ngei a ngai - Novak hi vaccine la duh lotu a ni.