ISL transfer Bazar boruak a 'hot' ṭan

Indian football hma hun chiang lo karah Indian Super League club-ten kut kuangkuaha ṭhut mai mai a rem chuang lo tih an hria a, nipui transfer-ah an bazar chhunzawm zel.

ISL club-ten Indian player ṭhate an inchuh nasa a, chu ai maha thawm ring erawh ram pawn player an ni a, Indian club-ten foreign player paruk an lak theih hi engtinnge an hnawhkhah dawn, tih chu mipui hriat châk a ni.

Indian football-a top flight league club-ten Indian football hrechiang sa ram pawn player lakluh an intihhmuh ṭan a, chumiin a hrinchhuah chu player inchuhsak a ni - league dang aṭanga seng luh an la awm nual tho tih erawh hriat a ṭha.

ISL-ah hian ATK Mohun Bagan, Bengaluru, Chennaiyin, East Bengal, FC Goa, Hyderabad FC, Jamshedpur FC, Kerala Blasters, Mumbai City, NorthEast United leh Odisha te an inel ang.

Hello Pogba!
Football ngaina inti chuan Paul Pogba kan hre vek ngei ang - a unaupa Florentin Pogba erawh Juventus midfielder ang ema lar a ni lo a, mahse, Guinea tana vawi 31 inlan tawh a nih avangin a chhe lo tih erawh a chiang.

ATK Mohun Bagan chuan Ligue 2 club Sochaux tana khel centre back hi kum hnih atan contract an ziahpui a, Kolkata club hian a man atan vaibelchhe 1.5 an seng a, kum khatah vaibelchhe hnih aia tam an hlawhtir dawn bawk niin an sawi.

Kolkata club hian Saudi club Al-Wehda aṭangin Australian attacking midfielder Dimitri Petratos an lalut tawh bawk a, A League club Melbourne Victory aṭangin Brendan Hamill chu season hnih chhung atan contract an ziahpui bawk.

ISL club neitu pakhat chuan, "Bagan hian an player duh chu lak ngei an tum zel a, sum an ren lo," tiin Vanglaini hnenah a lo sawi tawh - Kolkata club hian Finland international Joni Kauko, Moroccan midfielder Hugo Boumous leh Irish midfielder Carl McHugh an nei sa bawk a, foreign player neih theih zat an nei tawh.

Bengaluru-ah Krishna
Bagan-in foreign player thar pahnih an neih laiin an striker chhuanvawr Roy Krishna an chân a, Fiji international hian Bengaluru a zawm - kum khat chhung atan contract a ziak a, kum khat dang pawhsei theih a ni.

ISL match 60 a khelh tawh aṭanga goal 36 leh assist 18 neitu hian Bagan-ah khan season khatah nuai 500 chuang a hlawh ṭhin a, Bangalore club-ah hian eng zat chiah nge a hlawh dawn a hriat loh.

Bengaluru hian Brazilian centre back Alan Costa, Cruzeiro midfielder hlui Bruno Ramires leh Congo international Prince Ibara an nei sa.

Bangalore club hian Odisha FC attacking midfielder Javi Hernández chu kum hnih atan an lalut tawh bawk a, foreign player panga an nei tawh - hmun ruak pakhat an la nei.

Chennaiyin an kim?
South Indian club Chennaiyin-in Brazilian attacking midfielder Rafael Crivellaro an nei sa a, Mainz striker hlui Petar Sliskovic, Thai League 1 aṭangin Kwame Karikari leh Vafa Hakhamaneshi bakah Werder Bremen centre back hlui Fallou Diagne an lalut tawh.

German midfielder Julius Duker an dawr mek bawk a, he thuziak i chhiar meuh chuan an in lalut fel tawh hial mai thei - foreign player paruk an nei chiah ang.

East Bengal-in player lakluh an la nei lo a,Kolkata club hian Shree Cement thawhpui tawh dawn lo mah se, Kolkata khawpuia hmunpui nei Emami Group nen an thawk ho dawn - ram pawn player lakluh thawm an neih vat a rinawm.

FC Goa-in Morocco international Noah Sadaoui, Kerala Blasters aṭangin Alvaro Vazquez, Spanish third division lam aṭangin Iker Guarrotxena, Barcelona academy chhuak Marc Valiente leh Syria international Fares Arnaout an lalut tawh a, Spanish midfielder Edu Bedia an kawl sa bawk - foreign player an nei kim tawh.

Hyderabad hi
ISL champion Hyderabad an la che lo hle - Brazilian defensive midfielder Joao Victor, Nigerian striker Bartholomew Ogbeche, Spanish forward Javier Siverio leh Australian winger Joel Chianese an nei sa a, player dang an la lak belh lo.

Jamshedpur-in Brazilian centre back Eli Sabiá leh English centre back Peter Hartley an neih sa bak foreign player an la lak belh rih lo a, tih tur an la ngah hle.

Kerala Blasters-in Croatia tana vawi li inlan tawh Marko Leskovic leh Uruguayan attacking midfielder Adrián Luna an nei sa a, Australia tana vawi 12 inlan tawh Apostolos Giannou, Odisha aṭangin defensive midfielder Víctor Mongil leh Dynamo Kyiv aṭanga inzir chhuak Ivan Kalyuzhnyi te an lakluh belh bawk.

Mumbai City-in Morocco inter-national Ahmed Jahouh leh Senegalese defender Mourtada Fall an la chelh a, FC Goa aṭangin attacking midfielder Alberto Noguera, Melbourne City aṭangin defensive midfielder Rostyn Griffiths leh Jamshedpur aṭangin forward ṭha mi Greg Stewart an lalut bawk - hmun ruak pakhat a la awm.

Highlander an nil
NorthEast United-in he thu buatsaih a nih thleng hian ram pawn player lakluh an la nei lo a, Odisha erawhin ram pawn player lak theih an la kim thung.

Odisha hian Mumbai City aṭangin striker Diego Maurício, Spanish centre back Carlos Delgado, Spanish forward Pedro Martín, Getafe centre back hlui Víctor Rodríguez, A League club Perth Glory aṭangin Osama Malik leh Spanish midfielder Saúl Crespo te an la tawh.

ISL 2022-23 hi October-ah khelh ṭan a ni dawn a, March 2023 thleng khelh a ni ang - official takin ISL fixtures hi puan zar a la ni chiah lo a, October 6-a khelh ṭan tura beisei a ni thung.

November-ah World Cup 2022 khelh a nih dawn avangin ISL pawh hian thlasik chawlh an nei tura ngaih a ni a, he thu buatsaih a nih lai hian thuchiang erawh a la awm lo.