Sebastien Haller a damlo

Borussia Dortmund striker Sebastien Haller chu a tilmuah bawk a awm, bawk hi cancer niin khawthlang media-te chuan an tarlang. A club thuchhuah aṭanga a lan dan erawh chuan cancer tih hi puan a la ni chiah lo thung.

Bundesliga club hian Switzerland ramah season thar inbuatsaihna hun an hmang. Thawhṭanni tlai khan Haller hi a nuamsam lo a, endik a nih hnuah bawk a neih hi hmuhchhuah a ni.

Switzerland aṭangin Germany lamah a kir a, hetah hian a dinhmun hi endik nawn leh a ni ang. Dortmund sporting director Sebastian Kehl chuan, "Sebastien Haller chanchin kan hriat chuan min barakhaih hle.

"Dortmund chhung-kua chuan Haller hi dam ṭha leh thuai turin kan duhsak a, a ṭhat chhuah leh theih nan keini lam chuan kan theihtawp kan chhuah dawn a ni," tiin a sawi a, an striker thar chu thlahthlam an tum lo.

Nipui bazarah Dortmund hian an striker ṭha Erling Haaland an chân a, a thlakna atan Haller hi an lalut. Ajax tan Haller hian season hmasa khan goal 34 zet a khung, a goal khung zinga 11 hi Champions League bika a khung a ni.

Tuna a lan dan chuan Haller hian enkawlna a dawn a ngai dawn a, engtik thleng nge chawlh a ngaih dawn hriat a la ni lo. Striker ṭha kawl ṭhin Dortmund hian hun tepter tawh takah hmatawng tur an melh a ngai dawn niin a lang.