Marquez-a'n beisei a la nei sang

A ban hliam an zai aṭangin chawlhkar ruk a liam leh tawh a, la dam chiang lo mah se Marc Marquez chuan beisei a la nei sang. Tun season chhungin lo kir hman lo mah se, season tharah chuan bul a ṭan theih ngei an beisei.

Marquez hian a dam ṭhat lai chuan MotoGP a thunun hneh thei hle. Mahse, 2020 season bul ṭanna Spanish Grand Prix-ah a chesual a, a hnuah intlansiak hmachhawn ve leh fo mah se ngai a la awh leh thei lo.

A hliam hi ṭum thum ngawt zai a ni tawh, tun season tir lamah pawh intlansiak hmachhawn mah se tun hma boruak a phak thei lo. Harsatna lian tak ni hran lo mah se 100%-in a dam thei lo, hei vang hian season hmang chhunzawm loin an zai leh ta zawk a ni.

Kum 29 mi Marquez chuan, "Inenkawlna lam kan uluk a, hma pawh ka sawn chak viauin ka hria. A vawi hnih nana endik ka nih khan doctor chuan chanchin lawmawm min hrilh, a ruh hliam leh fuh lo lai awm chu siamrem a nih thu min hrilh.

"Doctor thu ka hriat chuan beiseina sang tak min siamsak, tun hma anga ban ṭha leh chak kha ka nei let leh ngei dawn ni pawhin ka hria," a ti. Marquez hi doctor Joaquin Sanchez Sotelo-a'n a zai a, chawlhkar ruk chhung a la enkawl chhunzawm leh rih ang.

March thlaa tlan zawh tak Indonesian Grand Prix-ah khan, tlanchhinna an neih laiin Marquez hi a chesual a, inelna tak pawh a hmachhawn thei lo. A hnuah Argentine Grand Prix a tlan ve thei lo bawk, tunah chuan season thar a thlir a ngai ta zawk a ni.