Spurs defender thar Spence

Tottenham chuan Middlesbrough defender Djed Spence an lalut, an defender thar man zat hi chiang taka tarlan a ni lo, mahse khawthlang media-te chuan pound maktaduai 20 thlenga sang chho thei tur a nih thu an sawi.

England Under-21 right back hian season hmasa kha Nottingham Forest-ah loan hmangin a khel, player pawimawh zinga mi niin Forest hi Premier League khel thei turin a inpetkaipui hial.

Kum 21 mi Spence chuan, "Tottenham ka zawm thei hi ka lawm, ka theihna leh thiamnate hi club tana hman ka châk tawh. Fans ṭhahnem tak hmaa inkhelh pawh ka châk tawh takzet," tiin a sawi.

Antonio Conte-a'n squad a thuam chak nasa hle. Tun nipui bazar chhungin player paruk ngawt a lei ta. Spence hma hian goalkeeper Fraser Forster, defender Clement Lenglet, midfielder Yves Bissouma leh forward Ivan Perisic leh Richarlison te a lo lei tawh bawk.