Real Madrid champion zan?

Zanin dar 12:30-ah Real Madrid chuan Villarreal an mikhual dawn a, Zinedine Zidane-a naute hian hnehna an chang a nih chuan match khat khelh tur la nei chungin La Liga champion an ni ang. Real captain Sergio Ramos chuan, "Ningani zanah champion kan lawm theih ngei ka beisei," tiin a sawi a, zaninah Villarreal hneh chunga league nomawi chawi ngei an tum dawn. 

Hetihlai hian Real Madrid hnaih bertu Barcelona chu zanin dar 12:30-ah vek an inlan dawn bawk a, Osasuna an mikhual ang - match hnih khelh tur la awmah Real hi point liin an phak lo mek. Barcelona tan champion tur chuan an hmabak match hniha chak a, Real an tawlhthluk ve ve a ngai a, thil thleng thei lo tia sawi tawp theih ni lo mah se beiseina tihsanna chi erawh niin a lang lo. 

Season ṭan dawna Real Madrid phurna ber chu Chelsea aṭanga Eden Hazard an lalut thei kha a ni a, mahse Premier League-a Chelsea thiampuipa hian La Liga lamah beisei a la phak lo rih hle. November-a hliam a neih hnu khan Hazard hi thla thum zet a chawl a, Covid-19 vanga league chawlh lailawk a nih avangin Belgian forward hian season tawp lam khel tura insiamremna hun a nei thung. 

La Liga khelh chhunzawm leh a nih hnua match hmasa berah bul a ṭan nghal a, mahse an match linaa Espanyol an hmachhawn ṭumin a inhliam leh - Real match hnuhnung paliah minute riat chiah a inkhel. Mahse, Zidane chuan, "Villarreal lakah chuan a ṭhat dan bera a khelh theih ka beisei," tiin a player chungchang hi a sawi a, zaninah Hazard hian Real tana nomawi hlawhchhuah ngei a duh ang. 

Real Madrid-in match hnih khelh tur la awmah point hnih chauh an mamawh tawh miau avangin an champion-a nomawi lawm dan tur thlengin an sawi ri leh tawh a, an fimkhur hle. Madrid khaw club-in nomawi an chawi apiangin an khaw hmun lar tak Cibeles Fountain-ah fans an pungkhawm ṭhin a, mahse kuminah erawh fan-te chu Covid-19 vanga pungkhawm rih lo turin Real director lam chuan an ngen. 

Real thuneitute hian an khelmual hmingthang Santiago Bernabeu-ah an champion a nih chuan lawm mai an rel a, hei pawh, "Boruak a him hunah," tiin an sawi. Hetihlai hian Madrid mayor Jose Luis Martinez Almeida pawhin fan-te chu Cibeles-a pungkhawm lo turin a ngen a, Madrid city council pawhin venhimna kalpui dan tur an rel bawk. 

Real Madrid-in champion lawm dan tur an rel mup mup laiin an hmelma Barcelona-in an chetsual an chang ve reng a, mahse Madrid chetsualna tur chuan 'thilmak' a ngaih tel tawh avangin Luis Suarez a beidawng. 

Barcelona forward Suarez chuan, "A nihna dik tak anga sawi dawn chuan La Liga hi beisei theih loh deuh thaw a ni tawh. Sevilla (0-0) kan draw khan thil a ti harsa a, Celta Vigo (2-2) laka kan chesual kha a pawi lehzual a ni," a ti. 

La Liga khelh chhunzawm leh a nih khan Barcelona hian table chung ber luahin hma an hruai a, mahse Sevilla, Celta Vigo leh Atletico Madrid (2-2) an inhnehtawkpui avangin Madrid tan kawng an hawnsak. 

Suarez chuan, "Celta kha hneh ta ila Atletico lakah kan chesual lo ang," a ti a, Atletico laka an result chu Celta nena an inkhel nghawng a nih thu a sawi. Suarez chuan, "Duhawm taka league khar a, Champions League lam thlir hi kan tih theih chu a ni ta," tiin a sawi zui.

•    Real Madrid-in champion turin point hnih chiah an mamawh tawh. 

•    Barcelona hian an hmabak match hnihah hnehna chang se, Real-in draw result ve ve nei se an point hmuh zat a inang ang. 

•    La Liga-ah head-to-head en a nih avangin Barca leh Real point hmuh zat inang pawh ni se tun season La Liga-a team pahnih inhmachhawna chungnung zawk Real chu champion tur an ni.

•    June 11 zana La Liga khelh ṭan leh a nih khan Barcelona chuan table chung ber an la luah a, Real nen match 27 ve ve khel tawhin point hnihin an sang zawk.