Goal khung thiam Atalanta

Thawhlehni zan khan Serie A inkhel pakhat a awm a, team kaltluang tak Atalanta chuan Brescia chu 6-2 a sawpin point 70 an hmu a, table-ah pahnihna dinhmun an luah.

Gian Piero Gasperini naute hian hmahruaitu Juventus an phak lohna chu point ruk a ni a, match khatin an khel hnem thung - pahnihna Inter Milan leh pathumna Lazio ten hnehna an chang a nih chuan Atalanta hi palinaah an tla thla leh thei.

Gewiss Stadium-a inkhelah Atalanta tan Mario Pasalic chuan hattrick a siam a, Marten de Roon, Ruslan Malinovsky leh Duvan Zapata ten goal khat ṭheuh an khung bawk - mikhual team tana Emesto Torregrossa leh Nikolas Spalek te goal khungin awmzia a nei phak lo.

Season hmasa khan Atalanta hi mi rin hlawh ni lo mah se Serie A-ah pathumna an nih phak avangin Champions League an khel. UCL-ah hian quarterfinal an lut fel der tawh. Kuminah pawh beisei aiia ṭhain an khel mek, league match 33 an khelh tawh chinah goal 93 ngawt khungin Italian league sang bera goal khung hnem pakhatna an ni - champion Juve-in goal 67 chauh an la khung.