Record nen Wigan chak

Thawhlehni zan Championship inkhelah Wigan Athletic chuan anmahni ang thoa Premier League lo khel tawh Hull City chu 8-0 in an sawp a, Championship-a inhnehna sang ber record chu an nihrual. 

Kum 2014 khan Bournemouth chuan 8-0 ngawtin Birmingham City chu inkhelh an lo zirtir tawh a, Championship-a inhneh chiang ber record an siam - he record hi Wigan chuan an rawn nihrual ve ta a ni. Latics (Wigan sawina) khelmual DW Stadium-a inkhelah hian first half chhungin Wigan-in goal sarih an khung a, minute khatnaah Kal Naismith chuan hma a rawn hruai. 

Wigan tan Kieran Dowell chuan hattrick siamin goal thum a rawn khung a, Kieffer Moore chuan goal hnih khungin Jamal Lowe leh Joe Williams ten goal khat ve ve an khung bawk. Premier League club hlui Hull tan November 1911-a Wolves 8-0 a an ngam loh hnua an chak loh chian ber ṭum a ni a, table-ah 22-na an nih mek bawk avangin League One lama tlak an hnaih hle. Hull City boss Grant McCann chuan, "Ka tihpalh takzet a ni. Fan-te hnenah ngaihdam dil ka duh," tiin an mualphona chu pawi a tih thu a sawi.