Mizoram inkhelh thiam ber Champhai Kanan

Team 204 telna LBS Suzuki All Mizoram Inter Village Football 2022 champion chu Champhai Kanan an ni. Champhai Kanan hian nimin khan Lammuala mipui sing chuang pungkhawm hmaah Sialhawk 2-0 in an hneh.

Champhai Kanan goal hnih hi R. Ramdinthara khung ve ve a ni a, man of the match-ah goal hnih luhna tura player thawh hlawk Tharpuia nau Laltlanzova (Zozoa) chu thlan a ni.

Bul ṭan dan
Sialhawk VC-in semifinal-a Ramhlun North hnehtu aṭangin player pakhat an thlak. Tlarhmaah Vanlalduata aiah Samuel-a dah luh a ni.

Goalkeeper-ah TC Ramnun-danga a awm a, defence laiah Lalchhanpuia leh Lalramhluna te an inkawp. Left back-ah Lalmuankima a awm.a, right back-ah Lalfamkima a awm thung.

Sialhawk hian 4-2-3-1 formation an hmang a, tlarhnung thlawp turin Lalhmangaihsanga (Patea) leh Vanlalbiakdika (BD-a) te an awm a, Crespo Vanlalhriatpuia chu playmaker tura dah a ni.

Tlarhmaah Rotluangliana a mal tlat a, mual sir aṭangin captain R. Laldanmawia leh Samuel-a ten an thlawp.

Champhai Kananin 4-3-3 formation bawk an rawn hmang a, bul ṭantu ngai vek an hmang. Goalkeeper-ah penalty shootout vawi thuma chhanhimtu Zosangliana a awm.

Defence laiah team innghahna captain C. Lalchhawnkima leh Vanramnghaka te an inkawp. V. Lallawmkima'n left back hna chelhin right back-ah F. Malsawmzuala (Mampuia) a awm.

Midfield-ah JH Remlala leh Jessie Lalmawizuala te an awm a, midfield hnung lam aṭanga game siam turin Lalramsanga a awm, ani hi kumin MFA Cup best player a ni thung.

Tlarhmaah H. Lalmuankima a awm a, MK-a hi R. Ramdinthara (Tharpuia) leh Laltlanzova (Zozoa) ten an thlawp. Zozoa hi kumin Khelo India-a Mizoram champion team-ah a tel.

A goal lo
Champhai Kananin passing game an rawn pholang a, inkhelh thiam zawk an nih tih an lantir. Chutihrualin Sialhawkin an ṭhatna an hrechiang a, an fitness leh an thahrui ngah chu an hmachhuan thung.

Final a nih miau avangin boruak a sang a, team pahnih an fimkhur. Goal chance ṭha hmuh tur a awm meuh lo. Champhai Kananin midfielder Rem Rema 'long shot' hmangin chance an nei a, Sialhawk tan hlauhthawnna tur a tling phak lo.

Champhai Kanan keeper Zosanga ball man a nghet tawk lo a, minute 16-na lekah ball man sual fuh tawk lo leh tibuaitu neih vangin goal-ah a lut. Sialhawk lawm hman viau mah se referee-in foul a ham zawk.

First half a hmuhnawm tawk lo a, Sialhawk innghahna Danmawia pawh a che thei lo. Goal awm loin first half a tawp.

Danglamna Tharpuia
Sialhawkin inkhel tihdanglam tumin Samuel-a aiah Vanlalduata an luhtir a, inkhel kal hmang erawh a danglam tam lo.

Champhaiin inkhel an thunun hret a, goal chance hmuh tur erawh a awm meuh lo. Sialhawk lamin keeper Zosanga ball hman ngheh tawk lo chu remchangah lak an tum a, freekick leh an chance neih goal-ah pet zel mah se Champhai Kanan keeper a chesual duh lo.

Minute 59-naah Champhaiin ṭum danga goal an khung ṭhin danin goal an khung a, goal ṭha a ni. Jessie Lalmawizuala'n through ball ṭha tak a pe a, ball um luttu Zo Zoa'n ven loha awm a u Tharpuia tan a pe chho. Goal khung theih vanga lar Tharpuia'n a hun ṭha neih hi chiang zetin a pet goal a, Champhai ṭantute thawm a ṭha hle.

Sialhawkin si phurh sut tumin hun rei lotê chhung nawr na mah se Champhai Kanan bawk goal-ah an hlauhawm. Zozoa ball pet chu crossbar chungah a kal a, a hnu lama freekick pet chu keeper TC Ramnundanga'n a dansak bawk.

Champhai Kananin corner leh freekick hmangin chance ṭha dang an nei a, Sialhawk tlarhnung a nghing nasa hle.

Minute 87-naah Zozoa'n offside trap a bum a, box chhungah a thiam thil pholangin Vanlalbiakdika lakah mawi zetin penalty a hlawh chhuak. Tharpuia a rawn pen chhuak a, chak nenmngehna goal cool takin a khung.

Sialhawkin siphurh sut turin hun pek belh nen minute ruk an nei a, freekick leh corner kick hmangin Champhai Kanan rum ṭhaih mah se captain Kimkima hote an ding khawng tlat a, 2-0 in hnehna an chang.

Kan vannei a ni. Pathian ropui ber rawh se. Pathian zara tun dinhmun thleng thei hi kan ni a, lawmthu sawi bak sawi tur dang ka nei lo. - H. Lianthanga (Mapuia), Champhai Kanan Coach

Aizawl veng theihna ka hria a, Champhai Kanan theihna ka hria. Aizawl kan rawn pan pawh khan ka zam hle. Ka beisei phak bakin kan che ṭha a, Lalpa'n thil ropui min tihsak a ni. - Lalchhawnkima, Champhai Kanan captain