Fulham chelhtu Baggies beiseina a sang

Premier League lama hun rei tak lo hmang tawh West Bromwich Albion chuan season thara English top flight khel leh turin kawng dik an zawh zel a, anmahni ang thoa Premier League-a mikhual lo Fulham nen Thawhlehni zan khan 0-0 in an inhnehtawk. 

Championship table-ah Baggies hi pahnihna an ni mek a, match hnih khelh tur an la neihah pathumna Brentford aia match khata khel tamin point liin an sang zawk - chetsual zauha dinhmun him lo thei erawh an la ni. Brentford hi nizan khan Preston North End nen an inkhel a, he thu buatsaih lai hian result kan hre hman lo. 

Hmahruaitu Leeds United chu zanin dar 9:30-ah an inlan dawn bawk a, table mawngphah luahtu Barnsley an mikhual ang. Leeds hian table chung berah point 84 an nei mek a, anmahni hnaih bertu Baggies aia match khata khel tlemin point hnihin an sang zawk. 

Mizote ṭan hlawh Leeds hian Barnsley hi an hneh a nih chuan match hnih khelh tur an la neih aṭanga point khat an hmuh chuan season tharah Premier League an khel thei ang. Championship aṭang hian table-a a sang pahnih chu season thara Premier League khel turin automatic-in an tling ṭhin a, pathumna aṭanga paruknain playoff khelin hmun ruak pakhat an inchuh leh ṭhin bawk.