Saudi Arabia-in beIN Sport chhuah phal lo

Middle East-a Premier League official broadcaster beIN Sport chu Saudi Arabia chuan an ram chhungah chhuah a phal lo a, hei hi Newcastle United lei tumna boruak vanga thlengah ngaih a ni. 

Saudi Arabia sorkar hnuaia Public Investment Fund chuan Magpies-ah 80% neih tumin indawrna an kalpui mek a, dodalna tam tak a awm avangin Premier League chuan Saudi PIF-in Magpies an lei felna tur hi a la pawmpui thei lo. 

Qatar-a hmunpui nei beIN Sports hian Middle East-a Premier League chhuah phalna hi kum thum chhung atan pound maktaduai 400-in an lei a, mahse Saudi broadcaster pakhat beoutQ chuan beIN Sports-in sum tam tak senga a pekchhuah ṭhin infiamnate chu man chawi loin a lo pe chhawng ve leh ṭhin. 

BeIN Sports hian Saudi sorkar chu beoutQ hum tlatah puhin April khan Premier League thuneitute hnenah Saudi sorkar inrawlhna PIF chu Magpies lei tir lo turin an lo ngen tawh. Saudi sorkar chuan beIN Sports hi an hming hliauna tura hnathawkah puhin an rama he channel chhuah phal loh chhan a nih thu an sawi a, beIN Sports chuan, "Engtikawng pawha pawm dam theih loh thutlukna mawlmang a ni," tiin an sawi thung. 

June khan World Trade Organization chuan Saudi sorkar hi beoutQ-a puihna kawngah international piracy dan a bawhchhiat thu an sawi a, Saudi chuan beoutQ an thawhpui loh thu an sawi ve reng thung. Saudi PIF hian Magpies lei tur hian Amanda Staveley leh Reuben brothers an thawhpui a, mimal zalenna kawnga an ram a hmingchhiat em avangin tlawmngai pawl hrang hrang aṭang pawhin Premier League club lei an tumna kawngah dodalna an tawk nasa hle.