Dovizioso a dam fel hman

Ducati rider Andrea Dovizioso chu khingkhang ruh tliak vanga enkawl a nih hnuah MotoGP an ṭan hmain a dam fel hman. July 19, Pathiannia inelna an neih hunah a inlan nghal thei ang.

Kum 34 mi Dovizioso hi thla hmasa khan Italy hmar lama intlansiakna tenau an neih ṭumin a hliam a, a hliam hi zai niin hun rei tak chu bike khalh thei loin a awm. Thawhlehni khan a team chuan an rider dam thu hi an puang a ni.

Ducati chuan thuchhuah siamin, "Uluk takin endik leh a ni a, amah enkawltu doctor Angel Charte hnen aṭanga thu kan dawn danin Andrea Dovizioso chu tun kar tawpa inelna kan neih hunah a inlan thei ang," an ti.

Season hmasa khan Dovizioso hian point 269 hmuin pahnihna dinhmun a luah a, a chungah hian champion Marc Marquez (420 points) chauh a awm. Kuminah Ducati nike nen beiseina sang zawk nei chungin a inlan dawn. Bike intlansiakna sang ber hi Covid-19 vangin a hun pangngaiah season an ṭan thei lo. Season khuh hawn nan July 19 hian Jerez-ah an tlan ang a, July 26 hian a hmun ngaiah an tlan nawn leh ang.