Chelsea kutah Champion nomawi

Premier League champion Chelsea-in Pathianni khan Stamford Bridge-ah champion nomawi an chawi a, club legend captain John Terry thlahna leh chawimawina hun hman a ni bawk.

Italian manager Antonio Conte hote hian an match hnuhnung berah hian Sunderland 5-1 in an sawp a, Premier League season khat chhunga vawi 30 chak thei hmasa ber an ni.

5 Star Chelsea
Table mawngphaha awm Sun­derland-in minute thumna lekah Javier Manquillo hmangin hma an hruai a, he goal hi Chelsea hlim hun vaw chhetu ni loin Blues phurna petu zawk a ni.

Minute 8-na lekah Willian hmang­in Chelsea-in an sut a, second half-ah Eden Hazard leh Pedro ten goal khat ve ve khungin substitute Michy Batshuayi-a'n hun tawp dawn hnaihah goal hnih a khung leh bawk.

League match hnuhnung berah Chelsea-in goal nga an khung a, Black Cats laka an khelh dan hian tun season chhunga an khelh dan a sawi fiah. Blues hian seasaon ṭantirh lama an chefuh tawk lohna aṭanga an harhthar hnuah champion phuin season tluanin an khel ṭha a ni.

Sunderland erawh kum 10 chhung a zawna Premier League an khelh hnuah an relegate a, Jermain Defoe chuan league match hnuhnung ber inhliam vangin a khel thei lo. English striker kum 34-a upa hi Black Cats tan a khelh chhunzawm zel a rinawm loh.

Manager ṭha ber Conte
Italian journalist Stefano Bol­drini chuan, "Conte hian football chungchang ringawt hi darkar tin leh minute tin a ngaihtuah a, ni khat chhung hian darkar 48 chhung football a ngaihtuah ṭhin. A hna hi engtiklai pawhin a ngaihtuah a, training ground leh office bakah in lama a awm thlengin inkhel a thlir a, football sawiin coaching staff-te a be pawp reng ṭhin," tiin a hnampui Antonio Conte a fak.

Chelsea boss Conte hian fak a phu a, Premier League champion hi season tinin a hlu. Amaherawhchu tun season-ah chuan manager ṭha rual Jose Mourinho (Manchester United), Pep Guardiola (Manchester City), Jurgen Klopp (Liverpool), Arsene Wenger (Arsenal) leh Mauricio Pochettino (Tottenham) te an awm avangin ṭum dang zawng aia hlu pawhin sawi theih a ni.

Season ṭan hmain Chelsea hi champion rinkai an ni a, Mourinho hnuaia nomawi an chawi zawh chiah season-ah 10-na an nih phak ṭawk avangin Italian manager hmabak hi a awlsam lo. Blues champion theih chhan Conte tih nemngheh theihna chu Italian manager hian season ṭan hmain a mamawh a chiang a, Leicester City champion puitu N'Golo Kante bakah Marcos Alonso leh David Luiz te la lutin Victor Moses chu player naran aṭangin team innghahna ni tur khawpin a chher chhuak bawk.

Conte hian a duh ang player a lak hnuah pawh hlawhtlinna a chang mai lo a, Juventus boss hlui hian Italy-a a hman thiam tawh ṭhin formation chu Premier League-ah rawn thar thawhin tlarhnungah defender pathum a rem a, hemi mil tur hian player a thlang thiam a, hei hi a hlawhtlinna chhan ber a ni.

Tun season-ah Italian manager hian champion turin player 23 chiah a hmang a; Liverpool, Spurs leh West Bromwich Albion te nen player hman tlem lamah an intluk. Blues-in 2004-05 leh 2009-10 khan player 30 an hmang a, 2005-06 leh 2014-15 an champion khan player 25 an hmang a, season thara Champions League an khelh dawn avangin nomawi humhim tur chuan player lak belh an mamawh ang.

Conte Thukhawchang
Chelsea manager Antonio Conte chuan, "Nomawi kan chawi thei hi kei leh player-te tan chuan hun hlimawm tak leh hriatreng tlak a ni. Chelsea kan kal zel ang," tiin a lawm thu a sawi.

Italian manager chuan sawi chhun­zawmin, "Season hi a tawp tawha kan ngai a nih chuan kan tisual hle ang. Tunah chuan kan hlim tur chu a ni ngei a, amaherawhchu FA Cup final kan la khel dawn tih kan theihnghilh lo tur a ni. Arsenal hi 0-3 in kan hneh lo phawt a, a hnuah 3-1 in kan hneh leh a, tunah hian a vawi thum nan kan inhmachhawn dawn. Season ṭha taka khar turin chak kan mamawh a ni," tiin hmabak an la neih thu a sawi.

May 27, Inrinni zan dar 10:00 khian Wembley Stadium-ah Chelsea-in FA Cup-ah Arsenal an hmachhawn ang.

Ropui takin Terry thlah
Chelsea-in club legend John Terry thlah dan tur an duang lawk thlap a, Sunderland nena an match hnuhnung berah English defender hi a jersey number 26 nena inrem chiahin minute 26 naah an thlak. Blues player-ten player ropui thlah nan hian guard of honour an pe a, Terry hian Chelsea player nichunga Blues jersey a hak hnuhnun berah Premier League nomawi a chawi a ni.

Inkhelh banah Terry chuan, "Vawiin hi ka hun tawn zinga khirh ber zinga mi a ni. Ka inkhelh hun chhungin player ṭha bik leh manager ropui tak tak te nena thawhhona hun ka neih theih avangin ka vannei hle a ni. Tuna ka nomawi chawi chauh ni loin tun hmaa ka nomawi chawi theih nana tha thawhtu mimal tin chungah ka lawm em em vek a ni. Roman Abramovich chungah ka lawm a, ani hi ngaihtuah buai ngai loa khawvela football club neitu ṭha ber a ni. Kum naupang lam aṭanga senior thlenga a sum a sen phal avangin kum tinin hma kan sawn a, kei, player leh supporter te aiawhin lawmthu ka sawi a ni," tiin a lawm tih a zep lo.

Lawmthu sawi chhunzawmin Terry chuan, "Ka nupui fanaute ka hnungah an ding tlat a, sawi hmaih theih loh chu supporter-te in ni. Rinhlelh tur awm miah loin ka tan chuan supporter ṭha ber in ni a, kum 17 leka upa ka niha bul ka ṭan aṭangin ka tan hian in theihna zawng zawngin in pe a ni. Ka khelh chhiat chang a ka tihhnual chang che u pawhin ka hming lamin min au phur a, ka tan chuan in hlu a ni. Ka lawm e, tih hian ka tana in ṭhatna hi a thungrul zo dawn lo. Hei hi ka tiam a che u, engtik niah emaw chuan helai hmunah player leh club thinlung zawng zawnga ṭan turin ka rawn kir leh ang. In zavaia chungah ka lawm a, coach Antonio Conte chungah thinlung takin ka lawm bawk," tiin amah ṭantute hming a lam hmaih lo.

Kum 36 mi Terry hian kum 14 leka upa a nihin Chelsea hi a zawm a, London club hi match 717 khelh sakin Premier League (5), FA Cup (5), League Cup (3), Champions League (1) leh Europa League (1)-ah te a champion pui a ni.