Zidane hoin Real an champion

April 23 zana khelh El Clasico-a Real Madrid an tlawm khan La Liga nomawi inchuh boruak a nung sawt a, inkhelh zawha Real boss Zinedine Zidane thusawi erawh, "Engkim hi kan kutah a la awm. Kan hmabakah match ruk a la awm a, hnehna kan chan vek chuan kan champion ang," tih a ni - Zidane a nauten an pu thusawi an thlen dik tir a, an hmabak match-ah hnehna an chan vek avangin La Liga champion an ni.

Pathianni zanah Real Madrid leh Barcelona an inlan ve ve a, Real hi an tlawm a, Barca an chak chuan Catalan club hi an champion ang. Zan dar 11:30-ah club pahnih an inlan a, Barcelona-in Eibar 4-2 in hneh mah se Real Madrid-in 2-0 a Malaga an hneh avangin Zidane-a leh a nauten league nomawi an chawi.

Real tan Ronaldo

Malaga khelmualah Cris­tiano Ronaldo-a'n mi­nute hnihna lekah goal hmahruai a khung nghal a, Real-in pressure nei loin hahdam takin an khelh phah. Goal dang lut lawk lo mah se minute 55-naah Karim Benzema chuan an goal hnihna a khung a, Real an champion. Malaga tan Barca striker hlui Sandro khel ṭha viau mah se a sawi lawk angin a club hlui tan hna a thawhsak thei lo.

Real Madrid-in league-ah season tluanin champion an phu tih an pholang a, BBC tia hminglem an pek Benzema, Ronaldo leh Ga­reth Bale-a innghat ṭhin nia lang club hi player pathumah chauhah an innghat tawh lo. Khelhna hun pek an nih phawt chuan Isco, Alvaro Morata leh James Rodriguez-ten an theihna an pholang ṭhin a, vawiina Real hlawhtlinna hi 'team' hnathawh a ni.

A hming chu Zidane

Real player ropui ṭhin Zidane-a'n La Liga nomawi a chawi a, tunah chuan manager ropui huang chhungah a hming a ziak lut leh mek ta - Spanish club hi thla ruk a enkawl hman chauh tihin Champions League nomawi a chawipui a, thla 18 hnuah league nomawi a chawi. June 3-a khelh turin Champions League final a la hmabak mek bawk - an champion chuan Europe-a club inelna sang bera nomawi humhim thei hmasa ber an ni ang.

Kum 2012-a Jose Mourinho hnua league-a Real champion pui leh hmasa bertu Zidane chuan, "Kum rei tak chhung league nomawi chawi loin kan awm a, khawvela club ṭha ber kan nih avangin champion hi kan tih tur a ni. Ka ngaihdan chuan La Liga hi khawvela league harsa ber a ni a, kan champion hi ka hlim takzet," a ti - Zidane hi Real player zinga manager an nih hnua La Liga champion thei Bernd Schuster, Vicente del Bosque, Jorge Valdano, Luis Molowny leh Miguel Munoz te zingah a tel ve ta.

Messi & Enrique

Eibar khelmualah Bar­celona-in goal hnih chhuah hmasa mah se David Junca (own goal), Luis Suarez leh Lionel Messi goal hnih hmangin an chhanglet a, 4-2 in an chak. Messi-a'n goal hnih a khung chiah hian league-a a goal 37-na niin top scorer a ni a, a hnuaiah hian goal 29 khungtu Luis Suarez leh goal 25 khungtu Ronaldo-te an awm.

Barcelona manager Luis Enrique-a'n season tawpah Barca a chhuahsan tawh dawn a, May 27 zanah Alaves nen Copa del Rey final khelh tur la nei mah se Pathianni zan an inkhel hi Nou Camp-a a match hnuhnung ber a ni. Barca fan-ten a season hmasa bera treble nomawi chawipuitu coach hi an theihnghilh lo a, stadium chhungah "kan hnenah kumkhuain' tih banner lian tak chu Enrique thlah nan an tar. Spanish manager chuan, "Tun hi kan in mangṭhana a ni lo a, nakkumah chuan member nichungin Camp Nou-ah hian inkhel ka en leh dawn a ni," tiin a sawi.