France-ah Vinales chak ber

Pathianni zana tlan zawh tak MotoGP French Grand Prix-ah Maverick Vinales chu pakhatna a ni, rider championship-ah point 85 hmuin hmahruaitu a nih leh ta.

Le Mans-a intlansiakah Yamaha rider Vinales hian minute 43 leh second 29.793 chhungin a tlan thleng, lap hnuhnung ber an tlan laia pakhatna dinhmun an inchuh laiin a teammate Valentino Rossi a chesual thung. Italian rider hian point a hmuh belh loh avangin championship-ah Vinales hnungah a rih awm a ngaih phah a ni.

Khawtual tlangval Johann Zarco chuan MotoGP bike khalh chunga podium a lawn hmasak ber ṭum tawng turin pahnihna a ni a, a hnungah hian Honda rider Dani Pedrosa a thleng. World champion ni lai Marc Marquez erawh lap 18-naah a chetsual avangin a tlan zui thei lo.

French GP-a hnehna a chan kha Vinales tan MotoGP bike khalh chunga vawi li hnehna a channa chiah a ni a, Yamaha team-in GP-ah vawi 500 hnehna an channa chiah a nih bawk avangin a hlu zual ang.

Vinales chuan, "Ka tan chuan lap hnuhnung ber kha theihnghilh theih a ni tawh lo ang, intlansiak hnuhnung pahnihah beisei ka phak loha avangin tun ṭumah hian ka fimkhur hle. Pakhatna nih theihna hun ṭha ka nei tih ka hriat chiah phei kha chuan ka theihna zawng zawng sawm khawmin ka bei a ni," tiin a sawi.

French MotoGP Results
# Rider Ram Team
1 Maverick Vinales Spa Yamaha
2 Johann Zarco Fra Yamaha
3 Dani Pedrosa Spa Honda
4 Andrea Dovizioso Ita Ducati
5 Cal Crutchlow GB Honda
6 Jorge Lorenzo Spa Ducati
7 Jonas Folger Ger Yamaha
8 Jack Miller Aus Honda
9 Loris Baz Fra Ducati
10 Andrea Iannone Ita Suzuki